Andvíg innflutningi á hráum matvælum

Tæplega 60% Íslendinga eru andvíg innflutningi á hráum eggjum, hráu ófrosnu kjöti og ógerilsneyddum mjólkurvörum til Íslands. Rúmlega fjórðungur landsmanna er því hlynntur. Þá er rúmlega helmingur Íslendinga hlynntur því að málið verði sett í þjóðaratkvæðagreiðslu, verði frumvarp þessa efnis samþykkt á Alþingi.

Frétt af mbl.is

Ráðherra gangi erinda stórkaupmanna

Þetta eru niðurstöður skoðanakönnunar sem Gallup vann fyrir Bergþór Ólason, þingmann Miðflokksins, í marsmánuði. 15,2% segjast hvorki hlynnt né andvíg innflutningnum.

Samkvæmt niðurstöðum skoðanakönnunarinnar eru yngri svarendur síður líklegir til þess að vera andvígir, en í aldurshópnum 65 ára og eldri eru svarendur líklegastir til þess. Þá eru íbúar í öðrum sveitarfélögum en Reykjavík og nágrannasveitarfélögum líklegastir til að vera því andvígir.

Eftir því sem menntun svarenda eykst, eykst stuðningur við innflutning á hráum eggjum, hráu ófrosnu kjöti og ógerilsneyddum mjólkurvörum til Íslands, en 68% þeirra sem aðeins hafa lokið grunnskólaprófi eru því andvígir. Þá eru tekjulægri líklegri til þess að vera á móti innflutningnum.

Stuðningsmenn Framsóknarflokksins og Miðflokksins eru afgerandi andvígastir innflutningi, en 75% stuðningsmanna Viðreisnar eru honum hlynntir.

Úrtak fyrir könnunina var 1.421 af öllu landinu, 18 ára og eldri, handahófsvaldir úr Viðhorfahópi Gallup. Svarhlutfall var 55%.

• 1 blogg um fréttina

Bloggað um fréttina

• Samtök um rannsóknir á ESB ...: Tæp­lega 60% Íslend­inga and­víg inn­flutn­ingi ESB-hrámetis, aðeins rúml. 25% fylgjandi!