Innlent | mbl | 21.5.2019 | 17:55

„Þetta er einstakt tækifæri“

Þristar verða til sýnis á Reykjavíkurflugvelli. mbl.is/Kristinn Magnússon

„Þetta er alveg einstakur viðburður,“ segir flugrekstrarstjórinn Stefán Smári Kristinsson. Nóg er um að vera hjá honum á Reykjavíkurflugvelli en milli klukkan 18 og 20 verða fimm svokallaðar þristavélar , DC-3- eða C-47-flugvélar frá Bandaríkjunum, til sýnis á flugvellinum.

Þrjár vélanna voru komnar á Reykjavíkurflugvöll í gær, ein kom í morgun og síðasta lenti á vellinum fyrir tæpri klukkustund. Stefán segir að von sé á fimm þristum á morgun.

Vélin sem kom í morgun er að sögn Stefáns merkilegust. „Hún heitir That´s All, Brother, en var leiðtogavélin í innrás Bandaríkjanna í Normandí.“ Vélin kom til landsins rétt fyrir miðnætti en gat ekki lent í Reykjavík vegna þess að Reykjavíkurflugvöllur lokar klukkan ellefu.

„Það var ekki hægt að fá undanþágu frá Samgöngustofu,“ segir Stefán.

Frétt af mbl.is

Þristar til sýnis í kvöld

„Fljúgandi minjagripur“

„Ég fékk þann heiður að fljúga með, ásamt kollegum mínum, frá Keflavík til Reykjavíkur. Það var auðvitað mjög skemmtilegt og ekki eitthvað sem maður gerir á hverjum degi.“

Að sögn Stefáns er vélin, That´s All, Brother, í raun og veru fljúgandi minjagripur. „Hún er merkilegasta flugvél sinnar tegundar sem flýgur enn. Hinar eru allar á söfnum og eru ekki virkar.“

Hann segir að menn hafi viljað lenda á Reykjavíkurflugvelli, eins og í gamla daga. „Þetta var leiðin sem þeir fóru yfir hafið í tengslum við innrásina í Normandí og það var vilji til að hafa þetta eins,“ segir Stefán en leiðangurinn er í tilefni þess að í byrjun júní verða 75 ár liðin frá innrás Bandamanna í Normandi í síðari heimsstyrjöldinni.

Allar vélarnar eru áratuga gamlar og Þristurinn skipar merkilegan sess í flugsögu heimsins. mbl.is/Árni Sæberg

Spurður hvers vegna fólk ætti að skella sér á flugvöllinn segir Stefán að viðburðurinn sé einstakur. „Þetta er einstakt tækifæri. Það er sögulegt að sjá svona margar vélar af tegundinni DC-3 samankomnar á einum stað. Fyrir marga verður þetta í eina skiptið á ævinni sem það gerist,“ segir Stefán og bætir við að mikil sál og saga sé í vélunum:

„Áhafnirnar eru fullar af reynsluboltum í fluginu. Fólki gefst tækifæri til að spjalla við þá og heyra þeirra sögur,“ segir Stefán. Óvíst er hvort hægt verði að fara inn í vélarnar en það fer eftir áhöfnum.