Innlent | mbl | 27.5.2019 | 8:53 | Uppfært 12:26

Eina úrlausnin að leita til dómstóla

Ragnar Aðalsteinsson, lögmaður Guðjóns Skarphéðsinssonar, eins hinna sýknuðu, segir að engin önnur úrlausn sé í málinu en að leita til dómstóla eftir að ríkið sleit samningaviðræðum í sáttaumleitunum milli stjórnvalda og hinna nýsýknuðu í Guðmundar- og Geirfinnsmálum og aðstandenda þeirra. mbl.is/Valli

Ragnar Aðalsteinsson, lögmaður Guðjóns Skarphéðinssonar, eins hinna sýknuðu í Guðmundar- og Geirfinnsmálum, segir íslenska ríkið hafa slitið samningaviðræðum í sáttaumleitunum milli stjórnvalda og hinna nýsýknuðu og aðstandenda þeirra. Segir hann að engin önnur úrlausn sé í málinu en að leita til dómstóla.

Frétt af mbl.is

Guðjón hafnaði bótatilboði

Fréttablaðið greindi frá því í morgun að sáttaumleitanir væru að sigla í strand eftir að Guðjón hafnaði bótatilboði sáttanefndar stjórnvalda. Ragnar segist ekki vera í stöðu til að tjá sig um mál annarra sem koma að málinu. „En ég veit ekki hvort ríkið var búið á koma á samkomulagi við einhverja þannig að á enda væri komið.“

Líkt og fram kom í Silfrinu fyrr í mánuðinum fór Guðjón fram á að fá einn milljarð króna í bætur en greint hefur verið frá því að sáttanefndinni hafi verið sett 600 milljóna króna þak af ríkinu.

Frétt af mbl.is

Krefst milljarðs í miskabætur

„Alvarlegustu dómsmorð seinni tíma á Íslandi“

Ragnar segir að ríkið hafi frá upphafi gefið það í skyn að ef farið yrði fram á bætur sem ríkið teldi of háar yrði dómstólaleiðin alltaf niðurstaðan. Það hafi nú fengist staðfest. „Það er sennilega engin úrlausn önnur úr því að ríkið hefur ekki áhuga á að ljúka málinu með samkomulagi,“ segir Ragnar.

Frétt af mbl.is

Íhugar dómstólaleiðina vegna bóta

Hann bendir á að málið geti ekki verið léttbært fyrir ríkið. „Við verðum að hafa það í huga að verið er að fjalla um alvarlegustu dómsmorð seinni tíma á Íslandi,“ segir Ragnar.

Að óbreyttu verður það í höndum dómstóla að kveða á um bætur í málinu. „Þetta er ekki flókið mál, það þarf ekki að sanna eitt né annað, það þarf að ákveða fjárhæð. Í máli Guðjóns er ríkinu skylt að lögum að bæta honum tjón sem hann varð fyrir og það er svokölluð hlutlæg bótaskylda ríkisins,“ segir Ragnar.