Gert er ráð fyrir að nýir grænir skattar verði lagðir á almenna urðun sorps frá heimilum og fyrirtækjum strax á næsta ári. Þá verði gjald lagt á flúoraðar gróðurhúsalofttegundir, sem meðal annars er að finna í sumum kæliskápum. Áætlaðar tekjur ríkissjóðs munu nema 2,5 milljörðum króna árið 2021, þegar innleiðingu er lokið.

Að þessu er stefnt samkvæmt breytingartillögu við fjármálaáætlun fjármálaráðherra fyrir árin 2020-2024 sem loks var lögð fram í þinginu í dag.

Breytingartillögunni er ætlað að endurspegla breytta, og verri, stöðu hagkerfisins en þjóðhagsspá Hagstofu gerir ráð fyrir 0,2% samdrætti í landsframleiðslu á árinu, samanborið við 2,5% hagvöxt sem lagt var upp með við upphaflega gerð fjármálaáætlunar í mars.

Seinni tíma útgjöld

Af ýmsu er að taka í breytingartillögu meirihlutans. Skattar eru hækkaðir og útgjöld skorin niður til að ná endum saman. Ýmsum verkefnum er seinkað til að spara fé næstu ár, án þess þó að sjá megi að gert sé ráð fyrir auknum útgjöldum til þeirra verkefna á seinni hluta fjármálaáætlunar.

Ríkissjóður verður rekinn nálægt núlli næstu tvö ár, í stað 30 milljarða árlegs afgangs. Tekjur ríkisins verða samkvæmt tillögunni 25 milljörðum króna lægri en áður var gert ráð fyrir, og helst svo hvert ár svo langt sem áætlunin nær. Sömuleiðis er gert ráð fyrir að útgjöld ríkisins aukist um níu milljarða á næsta ári samanborið við fyrri áætlun og skýrist það af 11 milljarða hækkun í atvinnuleysistryggingasjóð og ábyrgðasjóð launa, sem viðbúið er að meira muni mæða á.

Hertu skattaeftirliti er ætlað að skila 300 milljónum aukalega á næsta ári, en þremur milljörðum á ári undir lok áætlunar, árið 2024.

Saga fjármálaáætlunar

• Fjármálaáætlun skal leggja fram árlega til næstu fimm ára í samræmi við fjármálastefnu. 
• Ráðherra lagði áætlun fyrir árin 2020-2024 upphaflega fram í mars, fimm dögum áður en Wow Air var lýst gjaldþrota.
• Fjármálaráð, sem lögum samkvæmt ber að yfirfara fjármálaáætlun, gagnrýndi upphaflegar tillögur fyrir að byggja á of bjartsýnum forsendum um þróun hagkerfisins, svo sem að yfirstandandi hagvaxtarskeið stæði til ársins 2024, það er í 14 ár samfellt.
• Undir þá gagnrýni tóku meðal annars Alþýðusambandið, Viðskiptaráð og þingmenn stjórnarandstöðu. Kom enda á daginn að fljótlega voru forsendur brostnar.
• Breytingartillaga vegna fjármálaáætlunar var lögð fram í dag og á að endurspegla breytta, og verri, stöðu efnahagslífsins
• Í millitíðinni var fjármálastefnu, sem fjármálaáætlun ber að taka mið af, breytt til að minnka þær aðhaldskröfur  sem fjármálaáætlun voru settar.

Tengdar fréttir

Fjármálaáætlun 2020-2024

4,5 milljarðar í hringrásarhagkerfi og fráveitumál

• „Mjög villandi málflutningur“
• Þróunaraðstoð langt undir markmiði
• Framhaldsskólar fá ekki skerðingu
• „Við viljum verja velferðina“

» Fleiri tengdar fréttir

• 1 blogg um fréttina

Bloggað um fréttina

• Ásgrímur Hartmannsson: Og hér eru svo slæmu fréttirnar