Innlent | mbl | 22.7.2019 | 17:40

„Nú þarf ekki lengur Stasi“

Brynjar Níelsson á þingfundi. Mbl.is/Hari

Brynjar Níelsson, þingmaður Sjálfstæðisflokksins, segir orðið hatursorðræða vera vinsælt á meðal þeirra sem „vilja losna við gagnrýni og andstæðar skoðanir“. Þetta segir Brynjar á Facebook-síðu sinni í dag, en þar kemur meðal annars fram að ekki þurfi lengur Stasi til að upplýsa um hatursglæpi, „netið og Bárur þessa lands sjá um það“.

Svo virðist sem Brynjari þykir orðið hatursorðræða vera orðið afar gildishlaðið, en hann telur þó „þetta hatursorðræðutal“ síður en svo nýtt af nálinni.

„Gamli Þjóðviljinn og önnur blöð og tímarit, sem vörðu Ráðstjórnarríkin og önnur sósíölsk ríki úti í eitt, notuðu þetta hugtak yfir alla gagnrýni á hugmyndafræðina og stjórnvöld í ríkjunum. Í Þjóðviljanum þótti gagnrýni á byggingu Berlínarmúrsins sérstaklega mikil hatursumræða gagnvart þjóð sem var að verja landamæri sín,“ segir Brynjar í færslu sinni.

Þá skrifar Brynjar um viðbrögð ríkja við hatursorðræðu á síðustu öld og nefnir þar sérstaklega Sovétríkin, Austur-Þýskaland og ríki Suður-Ameríku.

„Misjafnt var hvernig þessi ríki brugðust við hatursorðræðu eigin borgara. Í gömlu Sovétríkjunum var algengast að vista hatursorðræðumanninn á geðsjúkrahúsi og í verstu tilvikunum voru þeir sendir í Gúlagið. Í Austur-Þýskalandi var mest notuð útskúfunaraðferðin þannig að viðkomandi missti vinnuna og gat hvorki fengið húsnæði né Trabant. Í Suður-Ameríku var hatursorðræðumaðurinn skotinn á færi og stórtækastur í þeim efnum var Che Guevara, sem enn er í miklu uppáhaldi hjá vinstri róttæklingum,“ skrifar Brynjar.

Segir kaldhæðni felast í málfrelsissjóði

„Í hinum svokölluðu vestrænu lýðræðisríkjum, sem eru umfram allt annað upptekin af tjáningarfrelsinu, hafa menn tekið upp austur þýsku útskúfunar aðferðina í glímunni við hatursorðræðu auk vægra skilorðsbundinna fangelsisrefsinga þegar mikið liggur við. Nú þarf ekki lengur Stasi til að upplýsa hatursglæpina - netið og Bárur þessa lands sjá um það,“ skrifar Brynjar.

Brynjar spyr svo hvort að kaldhæðni felast í því „að kringum fólk sem stundar orðræðu sem byggist á raunverulegu hatri, er stofnaður málfrelsissjóður til að fjármagna kostnað sem af hatrinu hlýst,“ og vísar hann þar líklega til málfrelsissjóð til varnar konum sem tjá sig um kynbundið ofbeldi.