Ekki er til­efni til að efna til at­kvæðagreiðslu meðal flokks­manna Sjálf­stæðis­flokks vegna þriðja orkupakk­ans miðað við inn­tak máls­ins og eðli þess, að mati Birg­is Ármanns­son­ar, þing­flokks­for­manns Sjálf­stæðis­flokks.

Aðspurður seg­ir hann eng­in for­dæmi fyr­ir því að heim­ild­inni hafi verið beitt og að hún hafi ný­lega komið inn í skipu­lags­regl­ur flokks­ins. Hann kveðst ekki vita til þess að und­ir­skrifta­söfn­un sé haf­in.

Brýnt að ræða við flokks­menn

Birg­ir vís­ar til þess að þriðji orkupakk­inn feli ekki með nein­um hætti í sér þær stór­felldu breyt­ing­ar sem stund­um séu látn­ar í veðri vaka. „Þetta mál hef­ur að mínu mati fengið mun meiri um­fjöll­un og gagn­rýni en inn­hald þess gef­ur til­efni til. Það er út af fyr­ir sig staða sem þarf með ein­hverj­um hætti að bregðast við, en gef­ur að mínu mati ekki til­efni til al­mennr­ar at­kvæðagreiðslu,“ seg­ir Birg­ir sem á von á því að fund­ar­höld verði vegna máls­ins og stöðunn­ar í stjór­mál­um al­mennt á næstu vik­um. „Þing­flokk­ur­inn hef­ur rætt það, vegna þess­ara skiptu skoðana inn­an flokks­ins, að það sé brýnt að nota sum­arið til að eiga sam­töl við flokks­menn með ein­um eða öðrum hætti og ræða þetta mál, koma sjón­ar­miðum á fram­færi og hlusta á at­huga­semd­ir,“ seg­ir Birg­ir.

Styrm­ir Gunn­ars­son, fyrr­ver­andi rit­stjóri Morg­un­blaðsins, kvaðst í sam­tali við blaðið hafa orðið var við efa­semd­ir um orkupakk­ann, m.a. í þing­flokki sjálf­stæðismanna. Birg­ir seg­ir að það verði að koma í ljós hvort ein­hverj­ir þing­menn greiði at­kvæði öðru­vísi en aðrir í þing­flokkn­um. „Ég veit það eitt að þegar ákv­arðanir voru tekn­ar í þess­um efn­um inn­an þing­flokks­ins, þá var það gert án and­mæla og ég tel enga ástæðu til að ætla annað en að sú samstaða sem verið hef­ur í þing­flokkn­um hald­ist,“ seg­ir Birg­ir.

Viðmæl­end­ur blaðsins úr hópi and­stæðinga þriðja orkupakk­ans inn­an flokks­ins vilja sum­ir flýta flokks­ráðsfundi sem halda á í sept­em­ber nk. og halda hann áður en þing kem­ur sam­an og ræðir orkupakk­ann. Birg­ir seg­ir það ekki raun­hæf­an kost. „Flokks­ráðsfund­ur er hald­inn af öðru til­efni og til þess að fjalla al­mennt um stefnu­mörk­un flokks­ins, en ekki til að taka af­stöðu til ein­stakra mála. Það er nokkuð um­hend­is að færa jafn stór­an og viðamik­inn fund til,“ seg­ir hann og vís­ar til þess sem fyrr kom fram, að ann­ar vett­vang­ur verði notaður til þess að ræða mál­in.

Í um­fjöll­un um mál þetta í Morg­un­blaðinu í dag seg­ir Matt­hild­ur Skúla­dótt­ir, stjórn­ar­maður í Verði - full­trúaráði sjálf­stæðis­fé­lag­anna í Reykja­vík, and­stæðinga orkupakk­ans svekkta yfir því hvernig komið er og marg­ir séu óánægðir með rík­is­stjórn­ina.

Tengd­ar frétt­ir

Ísland og ESB

Þor­gerður Katrín: Tolla­stríð gagn­ast eng­um

• Til Brus­sel til að koma á eðli­leg­um sam­skipt­um
• Ótt­ast ein­angr­un og hóta neit­un­ar­valdi
• Vilja end­urupp­töku á viðræðum um aðild að ESB
• Sekta ekki skip sem upp­fylla ekki kröf­ur

» Fleiri tengd­ar frétt­ir