Eiríkur metinn hæfastur
Setja bókamerki
Hæfisnefnd hefur metið Eirík Jónsson, prófessor í lögum við Háskóla Íslands, hæfastan þeirra sem sóttu um embætti landsréttardómara. Frá þessu er greint á Kjarnanum og haft eftir ónafngreindum heimildarmönnum.
Til stendur að skipa stöðu eins dómara í Landsrétt eftir að Vilhjálmur H. Vilhjálmsson sagði starfi sínu lausu í vor og gaf út að hann hygðist setjast í helgan stein. Vilhjálmur var einn þeirra ellefu sem skipaðir voru löglega í dómarasæti Landsréttar á sínum tíma.
Eiríkur Tómasson, formaður hæfisnefndar, staðfestir í samtali við mbl.is að niðurstaða hæfisnefndar liggi fyrir, en segist bundinn trúnaði um niðurstöðu hennar þar til ráðuneytið birtir hana. Á hann von á að það verði gert á föstudag.
Alls sóttu átta um stöðuna, þar af tveir sitjandi dómarar í Landsrétti, þau Ásmundur Helgason og Ragnheiður Bragadóttir. Þau eru bæði á meðal þeirra fjögurra dómara sem Sigríður Á. Andersen, þáverandi dómsmálaráðherra, skipaði í embættið þrátt fyrir að hafa ekki verið metin meðal hæfustu umsækjenda af hæfisnefnd.
Hafa þau ekkert dæmt frá því Mannréttindadómstóll Evrópu komst að þeirri niðurstöðu að annmarkar á meðferð ráðherra og Alþingis við skipun dómara við Landsrétt hefðu falið í sér brot gegn Mannréttindasáttmála Evrópu.
Á meðal umsækjenda voru einnig Jón Höskuldsson og Ástráður Haraldsson en þeir voru, rétt eins og Eiríkur, ekki skipaðir dómarar á sínum tíma þrátt fyrir að hafa verið metnir meðal 15 hæfustu umsækjenda.
Eiríkur var, sem fyrr segir, metinn hæfastur en á eftir honum komu Ásmundur, Jón og Ástráður. Höfðu tveir umsækjendur, Friðrik Ólafsson og Ragnheiður Bragadóttir dregið umsókn sína til baka áður en hæfisnefnd lauk störfum.
Skattamál verði líklega „þeirra mesta klemma“
Telur sér ekki heimilt að úthluta Helga verkefni
Beint: Ný ríkisstjórn tekin við völdum
Fyrsti blaðamannafundurinn í heild sinni
/frimg/1/53/78/1537870.jpg)
Í kaffi með Vigdísi
Það er ekkert partí án spurninga!