Innlent | mbl | 25.8.2019 | 19:00

„Einfalt og sjálfsagt“ að sleppa kjöti

Margrét Björgvinsdóttir sjálfboðaliði bauð upp á niðurskorna ávexti á síðasta námskeiði. Ljósmynd/Aðsend

„Við erum í rauninni búin að vera að gæla við þetta og verið hálfkjötlaus mjög lengi. Við vinnum með mikið af ungu fólki og það hefur hreinlega færst í aukana að sjálfboðaliðar okkar sem og nemar séu grænmetisætur og vegan,“ segir Sólveig Ása Tryggvadóttir, framkvæmdastjóri AFS á Íslandi.

Stjórn AFS á Íslandi tók nýlega ákvörðun um að gera samtökin kjötlaus, það er að segja, að bjóða ekki upp á kjöt á námskeiðum og viðburðum á vegum samtakanna.

Frétt af mbl.is

Munu baunir bjarga mannkyni?

„Sjálfboðaliðarnir okkar byrjuðu á þessu fyrir löngu síðan en svo kom upp þessi hugmynd að taka skrefið til fulls, ekki síst vegna þeirrar umræðu um umhverfismál sem er búin að vera í gangi,“ segir Sólveig, en ákvörðunin var aðallega tekin með það að markmiði að minnka kolefnisspor samtakanna.

Frá komunámskeiði skiptinema AFS á Íslandi 2019-2020. Ljósmynd/Aðsend

„Við viljum vera umhverfisvænni og í raun krefjast sjálfboðaliðarnir okkar þess og unga fólkið. Þetta er einfalt og sjálfsagt skref, að okkur finnst.“

Frétt af mbl.is

Brasilía „útrýmandi framtíðarinnar“

AFS á Íslandi er hluti af mun stærri samtökum AFS sem stunda starfsemi í 99 löndum um heim allan og eru einna þekktust fyrir að halda utan um skiptinám fyrir ungt fólk.

Senda engan í helgarferð til Dallas

„Það sem við erum þekktust fyrir er að senda fólk út um allar trissur í flugvélum, sem er kannski ekki það umhverfisvænsta,“ segir Sólveig, en bendir á að samtökin notist í auknum mæli við lestarsamgöngur þar sem það er hægt, svo sem á meginlandi Evrópu.

„Það er ekki eitthvað sem við hér á Íslandi getum gert, en aftur á móti erum við auðvitað ekki að senda neinn í helgarferð til Dallas. Við erum að senda fólk í lengri tíma sem byr inni á fjölskyldum og vegum þannig upp á móti.“