Innlent | mbl | 8.11.2019 | 15:10

Kjarasamningagerð Play áhyggjuefni

Drífa Snædal, forseti ASÍ, segir umhugsunarefni að engir fulltrúar flugliða hins nýja flugfélags komi að gerð eigin kjarasamnings. Ljósmynd/ASÍ

Sé flugfargjaldið of lágt eru það aðrir sem greiða flugmiðann segir Drífa Snædal, forseti Alþýðusambands Íslands, í föstudagspistli sínum, þar sem hún gerir fyrirhugaðan launakostnað nýja flugfélagsins Play að umtalsefni.

„Það er fátt sem landinn kann betur að meta en ódýr flugfargjöld til útlanda,“ segir Drífa, en greint var frá því í fréttum í gær að launakostnaður Play yrði 27-37% minni en hann var hjá WOW air.

„Aðaleigandi og forstjóri þess flugfélags sem fór svo eftirminnilega á hausinn í mars síðastliðnum og kostaði 2000 manns vinnuna sagði launakostnaðinn hafa farið með félagið á hausinn. Ekkert er fjær lagi eins og alþjóð veit — hann var alveg einfær um að koma því á hausinn.“ Segir Drífa fulla ástæðu því til að velta fyrir sér sér hvernig hægt verði að greiða enn lægra verð fyrir vinnuframlag en gert var hjá WOW og nú er gert hjá Icelandair.

„Ýmsar vísbendingar hafa komið fram í kynningarefni fyrir fjárfesta þar sem á að vera „betri nýting“ á áhöfnum, sem sagt meiri vinna fyrir sömu laun. Vísað er í kjör sem flugliðum b[jóðast] á Írlandi en það hefur hingað til verið bækistöð flugfélaga sem halda kostnaði niðri með lágum launum og mikilli vinnu.“

Það veki þá áhyggjur að stéttarfélag hafi samið um kaup og kjör flugliða áður en nokkur slíkur hefur verið ráðinn og því sé erfitt að sjá hvort einhver flugliði hafi komið að eigin samningi. „Það eru því sannanlega ekki fulltrúar stéttarinnar sem semja um kaup og kjör heldur standa frammi fyrir orðnum hlut.“

Segir Drífa þetta brjóta í bága við allar grunnstoðir stéttarfélaga og rétt þeirra til þess að tryggja hagsmuni félagsmanna sinna með kjarasamningum.

„Grunnhugsunin er að vinnandi fólk kemur sér saman í stéttarfélag, kýs sér fulltrúa sem setjast svo við samningaborðið. Stéttarfélögin bindast svo heildarsamtökum til að búa til enn meiri slagkraft og njóta samstöðunnar þegar í harðbakkann slær. Það er væntanlega óþarfi að rifja upp hversu miklu máli þetta skipti þegar WOW fór á hausinn og ASÍ gat hlaupið undir bagga með Flugfreyjufélaginu sem greiddi félagsmönnum fyrir fram upp í kröfur þeirra á ábyrgðasjóð launa til að tryggja að fólk hefði til hnífs og skeiðar þegar launagreiðslur brugðust.

Það er skýr krafa til nýrra fyrirtækja á markaði að þau virði leikreglur hins íslenska vinnumarkaðar. Undirboð í kjörum kemur öllum við og bitnar á endanum á samfélaginu öllu, bæði launafólki og þeim fyrirtækjum sem virða leikreglur.“