Innlent | mbl | 14.12.2019 | 8:47 | Uppfært 14:44

„Allur okkar mannskapur á fullu“

Að störfum í Hrútatungu. mbl.is/Eggert Jóhannesson

Um 80 til 90 manns á vegum RARIK vinna að því hörðum höndum að koma rafmagni aftur á fyrir norðan eftir að óveðrið gekk yfir landið fyrr í vikunni.

„Allur okkar mannskapur er enn á fullu úti. Við kláruðum að mestu Húnavatnssýsluna gömlu í gær en nokkrir bæir á Vatnsnesinu fóru því miður aftur út og það verður unnið að því í dag,“ segir Helga Jóhannsdóttir, formaður neyðarstjórnar RARIK.

Hún bætir við að þau séu langt komin með Norðurland vestra.

„Það er búið að vera mikið álag á okkar fólki í langan tíman en fólk fer ekki heim fyrr en þetta er búið,“ segir hún.

Alls eru fjórir bærir á Vatnsnesi rafmagnslausir og verið er að koma spennu aftur á í Svarfaðardalnum með varaafli frá Dalvík.

Frétt af mbl.is

Dalvíkurlína líklega klár á miðvikudag

Á Skaga, norðan við Gauksstaði, voru fjórir bæir komnir með rafmagn en duttu svo aftur út. Vinna stendur yfir við Tjörneslínu.

mbl.is/Eggert Jóhannesson

Tré utan í rafmagnslínunni

Vandræði hafa verið með rafmagn í Öxnadal og Hörgárdal og hefur það komið en dottið aftur út þar. Skógur í Öxnadalnum fyrir ofan veginn í Þelamörk hefur valdið starfsfólki RARIK vandræðum. Þar eru tré utan í rafmagnslínunni sem er erfitt að ná tökum á. „Þetta er ekki algengt vandamál en það hlaut að koma að því,“ segir Helga.

Frétt af mbl.is

Gasofnar fyrir krókloppna Skagfirðinga

Rafmagn er komið á í Heggstaðanesi og Bárðardal.

Í tilkynningu á vefsíðu RARIK kemur fram að rafmagnslaust sé ennþá á Hafsteinsstöðum, Reynistað, Stóru-Gröf, Holtsmúla og Stóru-Gröf ytri í Skagafirði. Búið er að reisa staura en eftir er að strengja víra. Búast má við rafmagnsleysi í nágrenninu þegar þetta kerfi verður tengt við netið.