Innlent | mbl | 18.12.2019 | 0:07 | Uppfært 9:02

RÚV bregst við umræðu vegna fréttaflutnings

mbl.is/Eggert Jóhannesson

Fréttastofa RÚV sendi frá sér tilkynningu fyrr í kvöld til að árétta nokkur atriði vegna umræðu, meðal annars á Alþingi, um fréttaflutning í óveðrinu í síðustu viku.

Þar er meðal annars brugðist við yfirlýsingum um að almenn upplýsingagjöf til íbúa í versta veðrinu hafi brugðist.

„Sautján útvarpsfréttatímar eru daglega fluttir á Rás 2 á virkum dögum auk styttri fréttayfirlita. Í þeim var farið yfir veðrið, færð, rafmagnsleysi og aðrar aðstæður eftir því sem þær upplýsingar voru tiltækar,“ segir í tilkynningunni.

„Aðstæður voru hins vegar slíkar að upplýsingar voru ekki alltaf fáanlegar og stundum voru upplýsingar frá einni stofnun þvert á upplýsingar frá annarri. Ítrekað kom fram að ekki væri hægt að segja til um hvenær rafmagn kæmist aftur á þar sem það var farið. Í örfá skipti var í lok útvarpsfréttatíma vísað á vef RÚV með þeim skilaboðum að þar væri ítarlega fjallað um veðrið og áhrif þess enda ótakmarkað rými á vefnum.

Útvarpsfréttatímar RÚV á heila tímanum, sem alla jafna eru 3-5 mínútur, voru iðulega lengri þessa daga auk þess sem dagskrárgerðarmenn á Rás 2 fluttu hlustendum nýjustu tíðindi þegar þau bárust. Þá eru ótaldar hádegisfréttir og umfjöllun í Speglinum,“ segir einnig í tilkynningunni.

„Fréttastofan er meðvituð um að víðtæk áhrif óveðursins og gríðarlega erfiðar aðstæður viðbragðsaðila höfðu áhrif á upplýsingagjöf og þar með fréttaflutning af einstökum svæðum. Umfjöllun og fréttaflutningur RÚV var engu að síður mikill og ítarlegur í öllum þremur miðlum. Vægi útvarpsfrétta var enn mikilvægara en ella vegna rafmagnsleysis og um það var fréttastofan meðvituð og miðlaði nýjustu upplýsingum þangað um leið og þær lágu fyrir.“