Erlent | mbl | 13.1.2020 | 20:23

„Bandaríkin - Ísland 992:0“

Bernie Sanders vekur athygi á því á Twitter að árið 2018 féll enginn fyrir hendi lögreglu á Íslandi, samanborið við 992 í Bandaríkjunum. AFP

Bernie Sanders, sem sækist eftir því að verða frambjóðandi demókrata í forsetakosningunum í Bandaríkjunum á næsta ári, tekur Ísland sem dæmi í færslu á Twitter þar sem hann tekur saman tölfræði um lögregluofbeldi árið 2018.

Samkvæmt tölfræðinni sem Sanders vísar í skutu lögreglumenn í Bandaríkjunum 992 manns til bana árið 2018. Hann tekur svo dæmi um fimm önnur ríki, þar á meðal Ísland, þar sem enginn féll fyrir hendi lögreglu það ár.

Fatal shootings by police in 2018:

🇮🇸-0
🇫🇮-3
🇸🇪-6
🇫🇷-26
🇨🇦-36
🇺🇸-992

Imagine: Walter Scott—and so many others—would be alive today if we had the major criminal justice reform we need in this country.
— Bernie Sanders (@SenSanders) January 13, 2020

Íslenska lögreglan hefur í raun einu sinni gripið til þess neyðarráðs að beita skotvopnum sínum á vettvangi. Það var í Árbænum í lok árs 2013 þegar karlmaður hleypti af fjöldamörgum skotum á lögreglu- og sérsveitarmenn.

„Ímyndið ykkur: Walter Scott — og svo margir fleiri — gætu verið á lífi í dag ef réttarkerfið hefði gengið í gegnum þær endurbætur sem þörf er á,“ segir Sanders.

Frétt af mbl.is

Hver var Walter Scott?

Walter Scott var 50 ára gamall og fjögurra barna faðir. Hann var svartur, skotinn átta sinnum í bakið af stuttu færi af hvítum lögreglumanni. Heimsbyggðin sá hann skotinn til bana á myndbandi og vakti dauðsfallið mikla athygli vestanhafs og kom af stað mikilli mótmælaöldu um lögregluofbeldi í Bandaríkjunum.