„Hættum nú að tala þetta niður“
Setja bókamerki
Þórdís Kolbrún Reykfjörð Gylfadóttir, ráðherra ferðamála, iðnaðar og nýsköpunar segir að fólk eigi að hætta að tala álverið í Straumsvík niður. Hún gagnrýnir færslu Bjartar Ólafsdóttur, fyrrverandi umhverfisráðherra vegna mögulegrar lokunar álversins í Straumsvík.
Björt segir endalausa möguleika á annarri starfsemi á þessum stað, í staðinn fyrir álverið, og nefnir til dæmis „risa gróðurhús“ og fiskeldi. Auk þess telur Björt að slík starfsemi komi okkur Íslendingum út úr kolefnislosunar skammarkróknum sem mengandi stóriðjur hafa komið okkur í.
„Í fyrsta lagi kemur „risa gróðurhús“ ekki á nokkurn hátt í staðinn fyrir álver hvað varðar raforkunotkun. Öll gróðurhús á Íslandi nota um 80 GWh á ári samanlagt. Það er vissulega umtalsvert en ISAL notar um 3.300 GWh eða fjörutíu sinnum meira. Jafnvel þótt „risa gróðurhúsið“ yrði samfelld bygging meðfram Reykjanesbrautinni alla leið út í Leifsstöð næði það ekki ISAL í raforkunotkun,“ skrifar Þórdís Kolbrún.
Hún segir að það sé mjög ósanngjarnt að tala um að stóriðjan setji okkur í skammarkrók hvað varði kolefnislosun.
„Með því að nýta sjálfbæra orku Íslands til að knýja dálítinn hluta af verksmiðjum heimsins erum við þvert á móti að hlífa andrúmsloftinu við stórfelldri losun á gróðurhúsalofttegundum. Við megum með réttu vera stolt af þessu framlagi okkar. Já, við tökum vissulega á okkur töluverða losun – meira að segja mjög mikla samkvæmt höfðatölu – en með því sparast gríðarleg losun sem annars myndi verða,“ skrifar Þórdís Kolbrún.
Hún segir að það sé fráleitt að halda því fram að við séum í einhverjum skammarkrók. Losunin væri margfalt meiri ef starfsemin væri knúin þeim orkugjöfum sem eru algengastir annars staðar í heiminum.
„Það er síðan allt önnur umræða að skoða breytingarnar framundan, á raforkumarkaði, fjölbreyttari orkukaupendum, aukinni matvælaframleiðslu á Íslandi sem ég vona að verði o.s.frv o.s.frv.,“ skrifar Þórdís Kolbrún og hnykkir út með því að fólk eigi að hætta að tala álverið niður:
„Hættum nú að tala þetta niður og opnum augun fyrir jákvæðu framlagi okkar grænu orku til loftslagsmála, sem allir í heiminum virðast kunna að meta nema við sjálf.“
Nóvemberhitametið fallið?
Eldur kom upp í Sorpu
Vilja bora við Bolaöldu
Telur njósnirnar vega að lýðræðinu á Íslandi
Um 170 ný störf gætu skapast
Vatni hleypt aftur á Flateyri