Sýknaður af ákæru um nauðgun

Héraðsdómur Reykjavíkur hefur sýknað karlmann af ákæru um nauðgun, auk þess sem einkaréttarkröfu var vísað frá dómi. Maðurinn var ákærður af héraðssaksóknara fyrir að hafa árið 2018 á heimili konu í Reykjavík haft samræði og önnur kynferðismök við hana gegn hennar vilja með því að beita hana ofbeldi.

Hann var m.a. sakaður um að hafa slegið hana ítrekið í andlitið, bitið hana, tekið hana ítrekað kverkataki, rifið í hár hennar og haldið höndum hennar föstum. Fram kemur í ákærunni að hann hafi ekki látið af háttseminni þrátt fyrir að konan segði honum ítrekað að hún vildi þetta ekki og berði í hendur hans til að losa sig.

Málið var kært árið 2018. Konan sagði þau hafa farið heim til hennar eftir að hafa verið að skemmta sér í miðbænum ásamt fleira fólki. Þau hafi byrjað að stunda kynmök en ákærði hafi fljótlega orðið ofbeldisfullur gagnvart henni.

Í yfirheyrslu neitaði maðurinn sök. Hann kannaðist við að hafa farið heim með konunni og átt við hana kynmök. Þau hafi verið í fleiri en einni stellingu og konan tekið virkan þátt.

„Framburður brotaþola var trúverðugur og ítarlegri en framburður ákærða hvað lýsingu á kynmökunum varðaði. Dómurinn metur framburð ákærða ekki ótrúverðugan en þó ber hann þess merki að ölvunarástand hans umrætt sinn hafi skert minni hans nokkuð,“ segir í niðurstöðu héraðsdóms.

Fram kemur jafnframt að ekki hafi komið fram lögfull sönnun þess að maðurinn hafi haft ásetning til nauðgunar og var hann þvi sýknaður í málinu. 

• 1 blogg um fréttina

Bloggað um fréttina

• Guðlaugur Guðmundsson: Hafði ekki ásetning um nauðgun!!