„Þótt COVID-19-faraldurinn fari mikinn um þessar mundir láta kynsjúkdómarnir sitt ekki eftir liggja,“ segir í kynsjúkdómadálki nýjasta tölublaðs Farsóttafrétta, fréttabréfs sóttvarnalæknis. Fleiri tilfelli af kynsjúkdómum hafa greinst í fólki hér á landi fyrstu þrjá mánuði ársins en fyrstu þrjá mánuði síðasta árs.

Þórólfur Guðnason sóttvarnalæknir hafði vísað í þessa tölfræði á upplýsingafundum almannavarna með hálfkveðnum vísum sem ollu meðal annars þeim misskilningi að tilfellunum væri að fækka.

Hið rétta er að tilfellum er að fjölga þrátt fyrir samkomubann, en tölfræðin er þó aðeins frá janúar, febrúar og mars. Langmesti vöxturinn er í sárasóttartilfellum (sýfilis), en á þeim hefur orðið „umtalsverð aukning“. Árið 2019 voru tilfellin samtals orðin tíu í lok marsmánaðar en í ár eru þau orðin fleiri en 20. Árin 2015 og 2018 urðu tilfellin vart fleiri en 20 allt árið, sjá graf úr Farsóttafréttum:

Skjáskot/Farsóttafréttir

Um það bil helmingur þeirra sem greinst hafa með sárasótt á árinu er af erlendu bergi brotinn og 92% sárasóttarsjúklinganna eru karlar.

Engin HIV-smit í febrúar og mars

Lekandatilfelli eru einnig fleiri en þau voru í fyrra en sú aukning er þó mjög væg og nemur að því er virðist bara einu eða tveimur tilfellum. Karlar eru 73% þeirra sem greindust með lekanda og 82% þeirra eru þá með íslenskt ríkisfang.

Klamydían stendur í stað, uppsöfnuð tilfelli á árinu eru um 500 talsins. 92% sjúklinganna þar eru Íslendingar og kynjahlutföllin eru jöfn.

Engin tilfelli af HIV-smiti voru skráð í febrúar og mars á þessu ári sem kann að skýrast af því að flestir sem greinst hafa undanfarin ár eru af erlendu bergi brotnir og að mjög hefur dregið úr komu útlendinga til landsins, einkum í marsmánuði. Í janúar greindust fimm einstaklingar með smit, þar af tveir Íslendingar.

Þróun lekandatilfella:

Skjáskot/Farsóttafréttir

Skjáskot/Farsóttafréttir

Sárasótt

• Sárasótt smitast langoftast við kynmök. Hún skiptist í þrjú stig. Hið fyrsta einkennist af smitandi sárum, einkum á kynfærum (harðsæri), sem oft koma fram 2–4 vikum eftir smit. Þau hverfa á um tveimur mánuðum en 6–12 vikum eftir smit birtast einkenni annars stigs, útbrot á húð og slímhimnu, eitlastækkun, sótthiti og verkir. Mótefni verða þá greinanleg í blóði (t.d. með wassermanprófi). Fylgikvillar á þessu stigi eru einkum lið-, heilahimnu- og lifrarbólga. Ef ekkert er að gert kemur þriðja stig sárasóttar fram, allt að 30 árum síðar.
• Einkennin eru margvísleg, t.d. vefjaþykknun í líffærum (sýfilishnútar), hjarta- og æðasjúkdómar, blinda, geðveiki og lömun.
• Sárasótt getur smitast frá sýktri móður til fósturs; læknanleg á fyrri stigum með sýklalyfjum.

Tengdar fréttir

Kórónuveiran Covid-19

Stefna Norðmenn ríkinu vegna bólusetninga?

• 30% með langvarandi áhrif covid
• Mættu hafa í huga þar sem þeir kvarta á Tene
• „Er ég virkilega að deyja?“
• Rétti barni sínu frekar sígarettur en iPad

» Fleiri tengdar fréttir

• 1 blogg um fréttina

Bloggað um fréttina

• Torfi Kristján Stefánsson: Villandi upplýsingar!