Innlent | mbl | 20.4.2020 | 11:11 | Uppfært 14:25

Ógnaði starfsmönnum með dúkahníf

mbl.is/Sigurður Bogi Sævarsson

Einn drengjanna þriggja sem stálu bifreið á meðferðarheimilinu Lækjarbakka í Rangárvallasýslu í síðustu viku ógnaði starfsfólki heimilisins með dúkahníf til að komast yfir lykla að bílnum. Sömu drengir voru stöðvaðir á stolnu ökutæki fyrr í vetur og var þá notuð naglamotta til að stöðva för þeirra. Þetta kemur fram í dagbók lögreglunnar á Suðurlandi.

Frétt af mbl.is

Strokupiltar handteknir í Þykkvabæ

Líkt og fram kom í frétt mbl.is á fimmtudag voru piltarnir handteknir í Þykkvabæ skömmu eftir miðnætti en lögreglan á Suðurlandi, sérsveit ríkislögreglustjóra og áhöfn þyrlu Landhelgisgæslunnar komu að leitinni að drengjunum. Í frétt um strok þeirra í febrúar kom fram að þeir eru fæddir 2003 og 2004 og því 15 og 16 ára gamlir.

Frétt af mbl.is

Forgangsatriði að koma börnunum í öruggt skjól

Þrjú mál komu upp í síðustu viku hjá lögreglunni á Suðurlandi þar sem ökumaður bifreiðar er grunaður um að aka undir áhrifum áfengis.

„Í einu þeirra, þann 15. apríl, stálu ungir drengir bíl á meðferðarheimili í Rangárvallasýslu og fundust þeir og bíllinn í Þykkvabæ skömmu síðar. Einn þeirra hafði ógnað starfsfólki meðferðarheimilisins með dúkahníf til að komast yfir lykla að bílnum. Þessir sömu drengir voru stöðvaðir á stolnu ökutæki fyrr í vetur við Selfoss en þá var beitt naglamottu til stöðvunarinnar eftir að þeir höfðu virt að vettugi öll stöðvunarmerki lögreglu,“ segir í dagbók lögreglunnar.

Frétt af mbl.is

Ökuníðingarnir 15 og 16 ára

Einn ökumaður sem lögregla hafði afskipti af þann 18. apríl er grunaður um að hafa ekið bifreið sinni undir áhrifum fíkniefna Sá var stöðvaður á Suðurlandsvegi vestan við Selfoss og er jafnframt grunaður um vörslu fíkniefna.

Sjö umferðaróhöpp voru tilkynnt til lögreglunnar á Suðurlandi í vikunni sem leið. Í einu þeirra kvartaði ökumaður undan svima og fékk skoðun og aðhlynningu í sjúkrabíl vegna þess. Önnur eru samkvæmt tilkynningum án meiðsla.

27 voru í liðinni viku kærðir fyrir að aka of hratt á Suðurlandi. Einn þeirra mældist á 161 km/klst. hraða á Suðurlandsvegi við Laufskálavörðu og hlýtur viðeigandi sekt og sviptingu að launum. Annar íslenskur ökumaður mældist á 142 km/klst. hraða á Suðurlandsvegi við Dýralæk.