Létt á loðnum landsmönnum

Slakanir á samkomubanni eru nú hafnar og mikill erill hefur verið á hárgreiðslustofum landsins ásamt annarri þjónustu sem nú er búið að opna. Hjá Nonna Quest á Laugaveginum var byrjað að bóka um leið og ljóst var að opnað yrði í dag og biðröð var fyrir utan Ikea í morgun.

Nonni, eða Jón Aðalsteinn Sveinsson eins og hann heitir fullu nafni, segist hafa saknað þess mikið að ná ekki að spjalla við viðskiptavinina í stólnum. „Maður er vanur því að mæta í vinnuna og fá að vita hvað er að gerast í samfélaginu,“ segir Nonni í samtali við mbl.is. Áfram verður farið eftir viðmiðum um hreinlæti og fjarlægðir á milli fólks enda er mikið í húfi að ekki komi bakslag í aðgerðir til að halda aftur af veirunni þar sem ekki má mikið bregða út af í rekstrinum. „Nú verður maður bara að bretta upp ermarnar og reyna að hala inn. Reyna að koma út úr þessu standandi.“

Biðröð við opnun í Ikea 

Myndarleg biðröð var fyrir utan verslun Ikea sem var opnuð að nýju í morgun. Þar hefur verið hægt að versla á netinu og fá vörur afgreiddar en þrátt fyrir það var töluverð eftirvænting eftir opnuninni að sögn Stefáns Rúnars Dagssonar, framkvæmdastjóra Ikea á Íslandi. Alls geta 350 manns verið samtímis inni í búðinni, en henni er skipt upp í sjö svæði þar sem 50 manns geta verið og fylgst er vel með öllum talningum að sögn Stefáns.

mbl.is var á ferðinni í morgun.  

Biðröð myndaðist fyrir utan verslun Ikea í morgun rétt fyrir klukkan ellefu þegar verslunin var opnuð. Skjáskot

• 1 blogg um fréttina

Bloggað um fréttina

• Jóhannes Ragnarsson: Rakarinn fékk tvo Framsóknarmenn með skáldað hár og geitur á …