Innlent | mbl | 15.5.2020 | 12:01

85,5% vilja spilakassa lokaða til frambúðar

Alma Björk Hafsteinsdóttir, formaður Samtaka áhugafólks um spilafíkn. mbl.is/Kristinn Magnússon

85,5% þeirra sem tóku afstöðu í könnun sem Gallup gerði fyrir Samtök áhugafólks um spilafíkn vilja að spilakassar verði lokaðir til frambúðar.

Þetta kom fram á blaðamannafundi Samtaka áhugafólks um spilafíkn (SÁS) á Kjarvalsstöðum í morgun.

Frétt af mbl.is

Lokun spilakassa hafi þegar haft jákvæð áhrif

„Þegar spilakössunum var lokað í upphafi samkomubannsins bárust fréttir af spilafíklum sem hættu að spila og náðu betri tökum á lífi sínu. Það voru okkur því mikil vonbrigði þegar Íslandsspil sf. ákváðu að opna kassana á ný þann 4. maí. Allur þorri almennings er greinilega sama sinnis. Þótt COVID-19 gangi yfir hverfur spilafíknin ekki en okkur hefur nú gefist tími til að sjá jákvæðar afleiðingar lokunar spilakassa á Íslandi,“ segir Alma Hafsteinsdóttir, formaður SÁS.

Afmarkaður hópur fólks á bak við milljarðatekjur

Um 70% þeirra sem tóku afstöðu í könnuninni eru frekar eða mjög neikvæðir gagnvart því að starfsemi í almannaþágu sé fjármögnuð með spilakössum, en Íslandsspil eru í eigu Rauða krossins, Slysavarnafélagsins Landsbjargar og SÁÁ.

Af þeim sem tóku afstöðu í Gallup-könnuninni kvaðst aðeins tæpt eitt prósent hafa spilað í spilakössum á Íslandi oftar en tvisvar á síðastliðnum tólf mánuðum. mbl.is/Eggert Jóhannesson

Tæplega helmingur telur að spilafíkn sé helsta ástæða þess að fólk spilar í spilakössum, en eitt prósent telur að fólk spili til að styrkja gott málefni. „Þessi niðurstaða kemur mér ekki á óvart en það er gott að nú liggi það fyrir svart á hvítu að almenningi finnist skjóta skökku við að Rauði kross Íslands, Landsbjörg, SÁÁ og Háskóli Íslands verði að reiða sig á fjárframlög frá mjög litlum hópi fólks sem glímir við spilafíkn. Þetta er þeim mun sorglegra í ljósi þess að þessi öflugu samtök og stofnun hafa unnið landi og þjóð svo mikið gagn í áranna rás,“ segir Alma Hafsteins.

„Sú staðreynd hve fáir spila að staðaldri í spilakössum sýnir að mjög afmarkaður hópur fólks er á bak við þær milljarðatekjur sem spilakassarnir færa eigendum sínum á hverju ári. Því er ekki um að ræða litlar fjárhæðir frá mögum heldur allt frá fáum,“ bætir Alma við en af þeim sem tóku afstöðu í Gallup-könnuninni kvaðst aðeins tæpt eitt prósent hafa spilað í spilakössum á Íslandi oftar en tvisvar á síðastliðnum tólf mánuðum.

Könnunin var gerð 30. apríl til 11. maí síðastliðinn. Um netkönnun var að ræða og var úrtakið 1.529 manns af öllu landinu, 18 ára og eldri, handahófsvaldir úr viðhorfahópi Gallup. 840 svöruðu könnuninni og þátttökuhlutfall var því 54,9 prósent.