Innlent | mbl | 18.6.2020 | 9:04

Helgi Hrafn líkir Guðmundi við Trump

Helgi Hrafn (t.v.) og Guðmundur Franklín (t.h.) mbl.is

Helgi Hrafn Gunnarsson, þingmaður Pírata, vandar Guðmundi Franklín, forsetaframbjóðanda, ekki kveðjurnar í færslu á Facebook.

Þar segir Helgi pólitískan stíl Guðmundar líkjast um margt pólitískum stíl Donalds Trump Bandaríkjaforseta. Þá segir Helgi Hrafn að forsetatíð Guðmundar myndi einkennast af dómgreindar- og ábyrgðarleysi, fljótfærni, ofureinföldunum og skeytingarleysi gagnvart staðreyndum.

„Það er ekkert í lagi hvernig þannig stjórnmál hafa verið að færa sig upp á skaftið síðustu ár. Eina leiðin til að tryggja að þannig stjórnmál festist ekki í sessi, er með því að sem flestir kjósendur mæti á kjörstað og kjósi eitthvað annað“, skrifar Helgi Hrafn sem kveðst ætla að kjósa Guðna Th. Jóhannesson, sitjandi forseta, þó hann hafi ekki gert það síðast.

Kemur Helga ekki á óvart

Helgi fer ófögrum orðum um Guðmund sem hann segir að hafi sýnt bæði getu- og metnaðarleysi þegar kemur að því að draga rökréttar ályktanir út frá aðgengilegum upplýsingum og rökfræði. Guðmundur virðist því taka því „fyrsta sem honum dettur í hug sem augljósum sannleika ef það passar við heimsmyndina hans“að sögn Helga Hrafns.

„Að þessu leyti minnir pólitískur stíll Guðmundar Franklín óneitanlega á stíl Donalds Trumps, sem kemur ekki á óvart miðað við að Guðmundur Franklín hefur opinberlega lýst yfir stuðningi við þann dæmalausa vitleysing og hrotta. Það er eins og að þessi týpa líti svo á að sannleikurinn sé eitthvað svo óaðgengilegt og órannsakanlegt, að skoðanir fólks séu í rauninni alveg jafn gildar og staðreyndir. Það er vitaskuld misskilningur“, skrifar Helgi Hrafn.