Innlent | mbl | 1.10.2020 | 9:47

Stuðningsyfirlýsing við náttúruna undirrituð

Guðmundur Ingi Guðbrandsson, umhverfis og auðlindaráðherrra. mbl.is

Ísland var í hópi yfir 70 ríkja sem skrifuðu undir stuðningsyfirlýsingu við náttúruna í aðdraganda 75. allsherjarþings Sameinuðu þjóðanna sem nú stendur yfir. Í yfirlýsingunni hétu ríkin því að auka metnað í loftslagsmálum, stuðla að sjálfbærum neyslu- og framleiðsluháttum og hafa loftslag, umhverfi og líffræðilega fjölbreytni að leiðarljósi við uppbyggingu í kjölfar COVID-19 faraldursins.

Þetta kemur fram í tilkynningu á vef stjórnarráðsins.

Guðmundur Ingi Guðbrandsson, umhverfis- og auðlindaráðherra, gerði vernd og endurheimt vistkerfa að umtalsefni í ávarpi sínu á fundi um líffræðilegan fjölbreytileika sem haldinn var í gær í tengslum við áðurnefnt allsherjarþing.

Guðmundur Ingi benti á nauðsyn líffræðilegs fjölbreytileika við að tryggja sjálfbærni og draga úr áhrifum loftslagsbreytinga. „Þær kerfislægu og áður óþekktu breytingar sem nú eiga sér stað á Norðurskautinu og öðrum viðkvæmum svæðum víða um heim kalla á að það verði strax gripið til frekari aðgerða,“ sagði Guðmundur Ingi í ávarpi sínu.

Endurheimt og vernd verði ofarlega

Þá sagði hann vernd gegn framandi ágengum tegundum og endurheimt skóglendis, votlendis og annarra mikilvægra vistkerfa eiga að vera ofarlega á dagskrá.

„Íslensk stjórnvöld hafa lagt áherslu á samlegðaráhrif þessa í aðgerðaáætlun sinni í loftslagsmálum. Ein grunnstoða hennar er endurheimt skóga og votlendis og að vinna þannig gegn landeyðingu og loftslagsbreytingum með náttúrumiðuðum lausnum sem líka stuðla að endurheimt líffræðilegs fjölbreytileika.“

Frétt af mbl.is

Hvergi slakað á hvað varðar hálendisþjóðgarð

Í stefnuyfirlýsingu ríkisstjórnarinnar er kveðið á um stofnun þjóðgarðs á miðhálendi Íslands en þar er að finna ein stærstu óbyggðu víðerni Evrópu. Áform um stofnun þjóðgarðsins hefur verið umdeild hér á landi.

Guðmundur Ingi greindi í ávarpi sínu frá því að vinna við undirbúning stofnunar hans væri nú í fullum gangi. „Öræfin ná yfir þriðjung landsins og verða stærsti þjóðgarður í Evrópu og jafnframt stærsta framlag Íslands til náttúruverndar hingað til.“

Vegna heimsfaraldursins sækja íslenskir ráðamenn ekki þingið í New York að þessu sinni. Ávarp Guðmundar Inga á fundinum í gær var því flutt af myndbandi um miðnætti í nótt að íslenskum tíma. Hér má sjá það: