Neitaði sök en játaði svo – 343 milljóna sekt

Ingimar Skúli Sævarsson hefur verið fundinn sekur um meiri háttar brot gegn skattalögum og fyrir peningaþvætti, sem framkvæmdastjóri og stjórnarmaður einkahlutafélagsins Verkleigunnar. 

Dómur þessa efnis var kveðinn upp í Héraðsdómi Reykjavíkur um miðjan október.

Upphaflega stóð til að þingfesta málið í mars en vegna farsóttar og samkomubanns var því frestað utan réttar um ótiltekinn tíma og var málið síðan þingfest 7. maí.

Breytti afstöðu sinni

Óskaði Ingimar þá eftir fresti til að taka afstöðu til ákærunnar og var málinu því frestað til 28. maí. Í þinghaldi þann dag neitaði hann sök og var verjanda hans veittur frestur til 3. september til að skila greinargerð.

Þeirri fyrirtöku málsins var svo frestað ótiltekið utan réttar að beiðni verjandans.

Loks, við þinghald í málinu 30. september, breytti Ingimar afstöðu sinni og játaði skýlaust sök sína.

Sam­kvæmt ákæru máls­ins stóð Ingimar skil á efn­is­lega röng­um virðis­auka­skatts­skýrsl­um fyr­ir Verk­leig­una frá mars til des­em­ber árið 2017 og komst þannig hjá því að skila rík­is­sjóði 57 millj­ón­um króna í virðis­auka­skatt.

Vantaldi tekjur og rekstrargjöld

Þá var hann einnig ákærður fyr­ir að hafa ekki staðið skil á staðgreiðslu­grein­um fyr­ir fyr­ir­tækið og þannig kom­ist hjá því að greiða staðgreiðslu op­in­berra gjalda upp á 30 millj­ón­ir frá októ­ber til des­em­ber þetta sama ár.

Sömuleiðis var hann ákærður fyr­ir pen­ingaþvætti með því að hafa ráðstafað pen­ing­un­um sem voru ávinn­ing­ur af fyrr­nefnd­um brot­um í þágu rekstr­ar fé­lags­ins, og fyrir brot gegn skatta­lög­um og lög­um um bók­hald með því að hafa á ár­un­um 2014-2018 staðið skil á efn­is­lega röng­um skatt­fram­töl­um fyr­ir sig.

Van­taldi hann á þess­um árum tekj­ur frá sjálf­stæðum at­vinnu­rekstri um 101 millj­ón og mögu­leg rekstr­ar­gjöld um 30,5 millj­ón­ir og tekj­ur frá fyrr­nefndu fyr­ir­tæki um 7,3 millj­ón­ir árin 2017 og 2018. Með þessu van­taldi hann tekju­skatt­stofn sinn um 66 millj­ón­ir og komst und­an að greiða tekju­skatt og út­svar upp á 27,5 millj­ón­ir.

Skýlaus játning fyrir dómi

Við ákvörðun refsingar í héraðsdómi var til refsimildunar litið til þess að hann hefði ekki áður gerst brotlegur við lög, skýlausrar játningar hans fyrir dómi og einnig þess að nokkuð var um liðið síðan hann framdi elstu brotin.

„Til þyngingar er horft til þess að brot hans námu háum fjárhæðum og náðu yfir langt tímabil. Í ljósi stöðu ákærða innan félagsins er því hafnað að litið verði til þess að hann hafi lítið komið nálægt skattskilum félagsins hluta þess tímabils er ákæra málsins tekur til,“ segir í dóminum.

Þótti því hæfilegt að dæma hann til fangelsisvistar í tvö ár, en skilorðsbinda dóminn til tveggja ára á sama tíma.

Þar að auki var hann dæmdur til að greiða 343.699.716 króna sekt í ríkissjóð innan fjögurra vikna frá uppkvaðningu dómsins, ella sæta fangelsi í tólf mánuði.

Áður fjallað um málið

Mál­efni starfs­manna­leig­unn­ar hafa áður ratað á síður fjöl­miðla, en eft­ir að fé­lagið varð gjaldþrota árið 2018 stofnaði Ingimar starfs­manna­leig­una Mann­gildi sem varð gjaldþrota seint á síðasta ári.

Eft­ir gjaldþrotið stofnuðu nokkr­ir fyrrverandi starfs­menn Verkleigunnar starfs­manna­leig­una Menn í vinnu, sem varð aðal­um­fjöll­un­ar­efni frétta­skýr­ingaþátt­ar Kveiks um dökk­ar hliðar ís­lensks vinnu­markaðar.

Frétt af mbl.is

114 milljóna skattabrot tengd starfsmannaleigu

• 1 blogg um fréttina

Bloggað um fréttina

• Jóhannes Ragnarsson: Útfararorð síra Baldvins yfir bersyndugum þorpara