Aldrei fleiri en 100 saman miðað við nýtt kerfi
Setja bókamerki
Miðað við nýtt litakóðakerfi almannavarna vegna Covid-19 verða samkomutakmörk ekki rýmkuð meira en í 100 manns meðan á faraldrinum stendur. Þá er tveggja metra regla í gildi innan allra litakóða. Jafnvel innan gráu viðvörunarinnar, hins nýja „norms“, eru samkomutakmörk í 50 - 100 manns.
Hér er farið yfir helstu þætti hvers litakóða fyrir sig en litakóðakerfið tók gildi í dag.
Rautt ástand nú í gildi
Sem stendur er alvarlegt ástand í gildi vegna Covid-19 hérlendis. Slíkt ástand er merkt rautt. Rautt ástand stendur fyrir miklar fjöldatakmarkanir. Í ástandinu felast „miklar líkur á mjög miklum samfélagslegum áhrifum. Strangar og íþyngjandi sóttvarnaaðgerðir á samkomum og jafnvel ferðum fólks innanlands. Mikil hætta á smitum og fólk beðið að halda sig innan síns nánasta tengslahóps og fara sérstaklega varlega í þjónustu og umgengni við viðkvæma hópa. Heilbrigðiskerfið er við þolmörk og álag á viðbragðsaðila mikið,“ segir á covid.is.
5-20 manna samkomutakmörk falla undir rautt ástand, sem og tveggja metra nálægðarmörk, grímuskylda í almenningssamgöngum, verslunum, þegar farið er á milli sóttvarnahólfa og í starfsemi sem krefst nándar. Samvera meðal allra nánustu er þó heimil.
Aukin hætta í appelsínugulu ástandi
Einu þrepi neðar en rauða ástandið er appelsínugult ástand sem ber heitið „Aukin hætta“. Í slíku ástandi eru „miðlungs eða miklar líkur á að faraldurinn hafi veruleg áhrif á samfélagið og daglegar athafnir fólks. Skerðing á þjónustu og samkomum er töluverð, sýkingarhætta hefur aukist og fólk beðið að halda sig innan síns nána tengslahóps og fara sérstaklega varlega í kringum einstaklinga í viðkvæmum hópum. Hætta er á að heilbrigðiskerfið sé undir miklu álagi,“ segir á covid.is.
Í appelsínugulu ástandi er samvera á meðal fólks í nánum tengslum leyfð, fjöldatakmörk á bilinu 20-50 manns, nálægðarmörk tveir metrar og grímuskylda í almenningssamgöngum og starfsemi sem krefst nándar.
Vertu á verði í gulu ástandi
Gula ástandið ber heitið „Vertu á verði“ en í því eru sóttvarnareglur í gildi sem eru þó mun minna íþyngjandi en í appelsínugulu ástandi. Gult ástand hefur nokkur eða staðbundin áhrif á daglegt líf fólks, „sem og takmarkanir á þjónustu og samkomum. Aukin hætta er á sýkingum, en þó þannig að sóttvarnaaðgerðir eru sértækar og er beint að þeim stöðum og þjónustu þar sem sýkingarhættan er mest. Fólk í áhættuhópum þarf að sýna aukna aðgát sem og þjónustuaðilar viðkvæmra hópa,“ segir á covid.is.
Í gulu ástandi er hert á persónulegum sóttvörnum, 50-100 manna samkomutakmörk eru í gildi, nálægðarmörk miðast við tvo metra og grímuskylda í almenningssamgöngum og starfsemi sem krefst nándar.
Grátt er „nýja normið“
„Nýja normið“ er svo grátt ástand. Þar eru sóttvarnir hafðar í fyrirrúmi en ástandið hefur þó óveruleg áhrif á daglegt líf fólks.
„Almenningur þarf að sinna persónulegum sóttvörnum og fara með gát. Grár er lægsta hættustigið og áhrifin eru einna helst á ferðir fólks milli landa, stærri samkomur og daglegt hreinlæti. Við þessar aðstæður mun ákveðin starfsemi þurfa að búa við skerðingar til lengri tíma. Grár er nýja normið okkar á meðan heimsfaraldurinn stendur yfir,“ segir á covid.is.
Í gráu ástandi eru 50-100 manna samkomutakmörk í gildi, rétt eins og í gulu ástandi, sem og tveggja metra regla. Notkun andlitsgríma á meðal almennings er þá talin óþörf.
Drónamyndskeið frá hápunkti gossins í nótt
Maskína: Framsókn í fallbaráttu
„Má segja að þetta gos hafi þjófstartað“
Virknin dregist saman um 600 metra
Líklega komin á seinni hluta hrinunnar í Svartsengi
Hótar Bretum og Bandaríkjamönnum