Segir klofning yfirvofandi

Tillaga um að lýsa yfir andstöðu við áform um að lágmarksfjöldi íbúa í sveitarfélagi yrði lögfestur, var felld naumlega á landsþingi Sambands íslenskra sveitarfélaga í gær. Alls greiddu 54 atkvæði með tillögunni en 67 gegn.

Atkvæðisréttur á landsþinginu fer eftir stærð sveitarfélaga, en þau 20 sveitarfélög sem lögðu tillöguna fram höfðu til að mynda aðeins 19 atkvæði af 136 á þinginu.

Þröstur Friðfinnsson, sveitarstjóri á Grenivík, bar tillöguna upp en hann segir í samtali við Bæjarins besta að Aldís Hafsteinsdóttir, formaður Sambandsins og bæjarstjóri í Hveragerði, hafi talað mjög ákveðið gegn henni.

Telur að ráðherra guggni

Samkvæmt áformum sveitarstjórnarráðherra stendur til að lögfesta lágmarksíbúafjölda í sveitarfélagi sem 250 árið 2022 og 1.000 árið 2026. 

Frétt af mbl.is

Lágmarksíbúafjöldi sveitarfélaga verði 1000

Þrátt fyrir að tillagan hafi verið felld segir Þröstur að niðurstaðan hljóti að vera mikið áfall fyrir formann og stjórn Sambandsins í ljósi þess hve mjótt var á munum. Alls höfðu tíu af ellefu stjórnarmönnum lagst gegn henni, allir nema Gunnar Einarsson úr Garðabæ.

„[Niðurstaðan] staðfestir að formaður hefur farið með rangt mál um breiða samstöðu sveitarstjórnarstigsins um íbúalágmark, gagnvart þjóð og þingi,“ segir Þröstur. Sigurður Ingi Jóhannsson samgönguráðherra hafi hins vegar opnað á það á þinginu að halda áfram með frumvarp um styrkingu sveitarstjórnarstigsins án ákvæðis um íbúalágmark. Telur Þröstur að það verði niðurstaðan.

Frétt af mbl.is

Tillagan mögulega ekki flutt

Þröstur segir Sambandið þurfa að „horfa inn á við“ og skoða hvernig það sinnir hlutverki sínu í hagsmunagæslu fyrir aðildarfélög. „Það eru líkur á að minni sveitarfélög myndi með sér formlegan félagsskap á næstunni til að sinna eigin hagsmunagæslu nema mikil stefnubreyting verði á störfum Sambandsins.“

• 1 blogg um fréttina

Bloggað um fréttina

• Helga Dögg Sverrisdóttir: Of fámennt, ganga á enn lengra