Innlent | mbl | 1.2.2021 | 23:38 | Uppfært 2.2.2021 7:11

Breyta umbúðum Lofts

Bjórinn er kominn í sölu á ný þar sem ekki sést lengur í sígarettu á umbúðunum. Ljósmynd/Ægir Brugghús

Brugghúsið Ægir hefur brugðið á það ráð að setja miða yfir sígarettu á umbúðum bjórs sem ber heitið Loftur. Umbúðirnar þóttu áður brjóta í bága við tóbaksvarnalög.

Sölubann var sett á bjórinn en umbúðirnar brutu í bága við tóbaksvarnalög, þar sem þær sýndu Loft Gunnarsson, sem lést árið 2012, þar sem hann hélt á sígarettu.

Á miðanum sem nú er yfir sígarettunni stendur skýrum stöfum: „RITSKOÐAÐ!“.

Fram kemur á Facebook-síðu brugghússins að líklega fari bjórinn aftur í sölu á morgun. Í síðustu viku var hann tekinn úr sölu en bjórinn kom fyrst á markað í janúar. Söluandvirði hans rennur í sjóð til styrktar útigangsfólki og var hann gefinn út til minningar um Loft Gunnarsson.