Innlent | mbl | 25.3.2021 | 18:43

Þrjú sækjast eftir 1. sæti VG í SV

Frambjóðendur í fyrsta sæti á lista Vinstri grænna í Suðvesturkjördæmi. Samsett mynd

Framboðsfrestur Vinstri grænna í Suðvesturkjördæmi er runninn út og ljóst er að þrjú stefna á oddvitasæti í kjördæminu.

Ólafur Þór Gunnarsson, læknir og þingmaður kjördæmisins skipaði annað sæti listans fyrir síðustu alþingiskosningar sækist nú eftir að leiða listann.

Eins og kunnugt er sagði fyrrverandi oddviti Vinstri grænna í Suðvesturkjördæmi, Rósa Björk Brynjólfsdóttir, sig úr þingflokki Vinstri grænna í vetur og gekk til liðs við Samfylkinguna.

Frétt af mbl.is

Rósa Björk gengur til liðs við Samfylkinguna

Níu gefa kost á sér í fimm sæti

Þá hefur Guðmundur Ingi Guðbrandsson, umhverfis- og auðlindaráðherra, einnig lýst því yfir að hann sækist eftir að leiða listann. Hann er búsettur í Reykjavík en segir ástæðuna vera m.a. að hans málefni eigi góðan hljómgrunn í Suðvesturkjördæmi. Guðmundur Ingi er utanþingsráðherra og er ekki kjörinn þingmaður eins og stendur. Hann sækist nú eftir umboði sem kjörinn fulltrúi.

Loks hefur Una Hildardóttir upplýsingafulltrúin sóst eftir 1. til 2. sæti. Hún er búsett í Mosfellsbæ og er sitjandi varaþingmaður og forseti Landssambands ungmennafélaga.

Alls gefa níu manns kost á sér í fimm efstu sæti í rafrænu forvali. Það mun fara fram daganna 15. til 17. apríl næstkomandi. Hafa ber í huga að iðulega er stuðst við fléttulista hjá Vinstri grænum.

Þau sem bjóða sig fram í forvali Vinstri grænna í Suðvesturkjördæmi eru:

Bjarki Bjarnason, rithöfundur og forseti bæjarstjórnar í Mosfellsbæ, 4.-5. sæti.
Einar Bergmundur Þorgerðar- og Bóasarson, hugbúnaðarsérfræðingur, 3.-5. sæti.
Júlíus Andri Þórðarson, stuðningsfulltrúi og háskólanemi, 4. sæti.
Kolbrún Halldórsdóttir, leikstjóri og fyrrverandi alþingismaður og ráðherra, 2. sæti.
Guðmundur Ingi Guðbrandsson, umhverfis- og auðlindaráðherra og umhverfisfræðingur, 1. sæti.
Ólafur Þór Gunnarsson, læknir og alþingismaður, 1. sæti.
Valgerður Bláklukka Fjölnisdóttir, þjóðfræðinemi, 3. sæti.
Þóra Elfa Björnsson, setjari og framhaldsskólakennari, 3.-5. sæti.