Ísland meðal grænna ríkja eftir leiðréttingu AGS

Alþjóðagjaldeyrissjóðurinn (AGS) hefur leiðrétt upplýsingar sem sjóðurinn birti á dögunum um samanburð á umfangi stuðningsaðgerða ríkja vegna Covid-19. Í uppfærðum upplýsingum AGS kemur fram að umfang aðgerðanna nemi 9,2% af vergri landsframleiðslu (VLF) og sé því hið hæsta á Norðurlöndunum.

Ísland er því í hópi „grænna“ ríkja, þar sem umfang stuðningsaðgerða er á bilinu 7,5-10% af VLF, en þar undir falla m.a. ríki á borð við Danmörku, Belgíu, Frakkland, Ítalíu og Spán.

Vantaði í tölurnar um Ísland

Í upphaflegri samantekt AGS var hlutfallið á Íslandi aðeins sagt vera 2,1%, en að sögn fjármálaráðuneytisins leiddi sú tölfræðiskekkja m.a. af því að aðeins var horft til nokkurra aðgerða, einkum hlutabóta, greiðslu launa á uppsagnarfresti og útgjalda innan heilbrigðiskerfisins. Þá náði samantektin aðeins til ársins 2020 en ekki til ársins í ár og þeirra næstu, öfugt við það sem gerðist um önnur lönd í skýrslu AGS og upphaflegu tölurnar um Ísland því ósambærilegar. Það hefur nú verið leiðrétt.

Í uppfærðum gagnagrunni AGS hefur verið tekið tillit til ýmissa veigamikilla stuðningsaðgerða, sem íslensk stjórnvöld hafa gripið til vegna heimsfaraldursins, og ekki komu fram í fyrri samantekt. Þar má nefna fjárfestinga- og uppbyggingarátak, tekjufallsstyrki, viðspyrnustyrki og framlengingu tekjutengdra atvinnuleysisbóta. Þá voru aukin framlög til ýmissa félagslegra málefna ekki talin með og ekki aukinn stuðningur við rannsóknir og þróun.

Þá var ekki tekið tillit til lækkunar ýmissa skatta og gjalda, sem eru hluti af stuðningsaðgerðum íslenskra stjórnvalda, þar á meðal lækkun og niðurfelling tiltekinna gjalda í ferðaþjónustu. Jafnframt hefur ríkissjóður ábyrgst lán til fyrirtækja, sem ekki var endurspeglað í gagnagrunni AGS.

Árangurinn í fremstu röð

Bjarni Benediktsson, fjármála- og efnahagsráðherra, fagnar því að þessi leiðrétting sé komin fram, enda hafi fyrri samantekt beinlínis gefið ranga mynd af stöðunni. „Í leiðréttum gagnagrunni kemur fram að óvíða hafa verið tekin stærri skref í að bregðast við efnahagslegum afleiðingum heimsfaraldursins.“

Hann bendir einnig áð að auk þessara aðgerða hafi sjálfvirkir sveiflujafnarar ríkisfjármálanna og aðrar hagstjórnaraðgerðir varið lífskjör á Íslandi. „Árangurinn sést best á því að ráðstöfunartekjur heimilanna eru taldar hafa aukist árið 2020 þrátt fyrir faraldurinn og innlend eftirspurn dróst aðeins saman um 1,9%, sem er með minnsta samdrætti á meðal Evrópuríkja.“

• 1 blogg um fréttina

Bloggað um fréttina

• Þorsteinn Siglaugsson: Grænt = Árangur í fremstu röð = Mest á hausnum