Yfir 80 þúsund eru fullbólusettir eða 24,8% þeirra landsmanna sem eru 16 ára og eldri. Stór bóluefnavika er framundan því von er á yfir 30 þúsund skömmtum af bóluefni í næstu viku samkvæmt afhendingaráætlun bóluefna á vef stjórnarráðsins. 

Þetta þarf hins vegar ekki að þýða að allir þessir skammtar fari í dreifingu í næstu viku þar sem þetta segir aðeins til um í hvaða viku bóluefnið er væntanlegt til landsins. 

Líkt og kom fram á mbl.is í gær verður bólu­sett með 7.700 skömmt­um af Pfizer í Laug­ar­dals­höll­inni á miðvikudag og rúm­lega þrjú þúsund skammtar verða gefnir af AstraZenca á fimmtudag og þar er bara um seinni bólu­setn­ingu að ræða. Konur yngri en 55 ára sem fengu fyrri sprautu af AstraZeneca geta valið um Pfizer eða AstraZeneca í seinni sprautu.

Í viku 21 er von á 14.040 skömmtum af Pfizer bóluefninu,10.560 af AstraZeneca og 2.640 skömmum af Moderna. Von er á 2.880 skömmtum af Janssen bóluefninu en það þarf aðeins að gefa einu sinni. 

Vikuna á eftir er von á 19.890 skömmtum af Pfizer og gildir það sama fyrir næstu tvær vikur á eftir. Í viku 25 og 26 (20. júní-3. júlí) er síðan von á 21.060 skömmtum af Pfizer hvora vikuna. 

Á covid.is kemur fram að 28,1% séu hálfbólusettir eða 83.351 og þeir sem eru fullbólusettir eru 80.464 talsins.

55% kvenna 16 ára og eldri hafa fengið að minnsta kosti eina bólusetningu á meðan 45% karla 16 ára og eldri hafa fengið að minnsta kosti eina bólusetningu. Hér er miðað við lok 19. viku þannig að þar vantar inn upplýsingar um þá sem eru bólusettir í þessari viku. Um allt land var verið að bólusetja í vikunni.