Innlent | mbl | 10.8.2021 | 12:35 | Uppfært 14:55

Hvetja fólk til að fara í bólusetningu

Frá bólusetningu við kórónuveirunni í Laugardalshöll. mbl.is/Kristinn Magnússon

Vegna aukinnar útbreiðslu Delta-afbrigðis Covid-19 í löndum ESB og EES hvetja Lyfjastofnun Evrópu (EMA) og Evrópska sóttvarnamiðstöðin (ECDC) alla þá sem hafa ekki verið bólusettir en eru gjaldgengir í bólusetningu, eindregið til þess að hefja og ljúka ráðlögðum bólusetningum vegna Covid-19 tímanlega.

„Full bólusetning með einhverju af þeim bóluefnum sem eru samþykkt af ESB/EES veitir mikla vörn gegn alvarlegum sjúkdómi og dauða af völdum SARS-CoV-2, þ.m.t. Delta-afbrigðinu. Mestu mögulegu verndinni er náð eftir að nægilegur tími (7-14 dagar) hefur liðið frá því seinni skammturinn var gefinn,“ segir í tilkynningu á vef Lyfjastofnunar.

Þar kemur fram að bólusetning sé mikilvæg til að vernda þá sem eru í mestri hættu á alvarlegum sjúkdómi og sjúkrahúsvist, til að draga úr útbreiðslu veirunnar og koma í veg fyrir að ný afbrigði breiðist út.

Bólusetning í Lissabon í Portúgal. AFP

Sýkingar þýði ekki að bóluefnin séu ekki að virka

„Í sumum bólusetningarherferðum getur verið ráðlegt að minnka bilið milli fyrsta og annars skammts innan leyfilegra marka, sérstaklega fyrir fólk sem er í áhættuhópi fyrir alvarlegum einkennum Covid-19 sjúkdómsins og hefur ekki náð að ljúka ráðlögðum bólusetningum,“ segir í tilkynningunni.

Fram kemur einnig að sýkingar hjá bólusettu fólki þýði ekki að bóluefni séu ekki að virka.

„Þó að virkni allra bóluefna gegn Covid-19 sem hafa markaðsleyfi innan ESB/EES sé mjög mikil, þá er ekkert bóluefni með 100% virkni. Þetta þýðir að búast má við takmörkuðum fjölda SARS-CoV-2-sýkinga meðal einstaklinga sem hafa lokið ráðlögðum bólusetningum. Aftur á móti, þegar sýkingar verða hjá fólki, geta bóluefnin, að stærstum hluta, komið í veg fyrir alvarlegan sjúkdóm og dregið mjög úr innlögnum fólks á sjúkrahús vegna Covid-19-sjúkdómsins.“