Uppskera er lyginni líkust

„Uppskeran er með ólíkindum. Við byrjuðum að þreskja mánuði fyrr en á síðasta ári. Þroski kornsins og uppskera er lyginni líkast,“ segir Hermann Ingi Gunnarsson, bóndi á Klauf í Eyjafjarðarsveit, um kornuppskeruna. Hann getur þess að uppskeran af þeim 8-9 hekturum sem hann var búinn að þreskja þegar rætt var við hann sé meiri en af öllum 25 hekturunum á síðasta ári og kornið miklu betra.

Hitinn í júlí og ágúst er vitaskuld skýringin á góðri kornuppskeru á Norður- og Austurlandi. Kornbændur eru almennt að hefja kornslátt. Hins vegar bíða bændur á Suður- og Vesturlandi eftir betra veðri og meiri þroska. Bændur þar eru bjartsýnir á þokkalega uppskeru en varasamt er að ræða um tölur í því efni fyrr en kornið er komið í hlöðu.

Plantan nýtti sólskinið

„Það leit ekki vel út með kornið í vor og fram í júní. Við sáðum snemma og þar sem mikill raki var í jörðu spíraði fræið fljótt þótt kalt væri. Það var stillt veður og sól og logn. Kornið var komið upp um miðjan júní. Svo gerðist allt á einni eða tveimur vikum um mánaðamótin júní og júlí og kornið var allt skriðið fyrstu vikuna í júlí,“ segir Hermann og getur þess að það gerist venjulega ekki fyrr en um miðjan júlí. Kornið nýtti vel norðlensku sólina í sumar og Hermann segir að það hafi náð fullum þroska snemma í ágúst.

Tvær þreskivélar að störfum á akri Jóns Elvars Hjörleifssonar, bónda á Hrafnagili. Neðst sést til gamla húsmæðraskólans og grunnskólans á Laugalandi. mbl.is/Þorgeir Baldursson

Uppskeran er eftir því. Meðaltalið af því sem búið er að þreskja hjá Hermanni er 6,5 tonn á hektara og af einum akrinum komu 8 tonn. Til samanburðar má geta þess að uppskeran hjá honum var 3,5 tonn eftir hektara á síðasta ári og telur að uppskeran síðustu fimm ár rétt hangi í þremur tonnum. Uppskeran í ár er með því mesta sem hér hefur sést. Hermann er þó feiminn við að ræða um Íslandsmet, segir erfitt að fá upplýsingar um það. Hann leyfir sér þó að segja að afburðagóð fylling í korninu geri rúmþyngdina í uppskerunni nú líklega að Íslandsmeti. Nú eru 730 kg í rúmmetra af korni af hans ökrum en í góðum árum fari það ekki yfir 600 kíló.

Hermann þurrkar kornið á Hjalteyri í félagi við Jón Elvar Hjörleifsson á Hrafnagili og leggur það inn í Bústólpa. „Þeir segjast ekki fá svona gott korn, ekki einu sinni frá útlöndum,“ segir Hermann Ingi.

Hermann er að keppast við að ná sem mestu í þessari viku og vonast til að ljúka uppskerustörfum fyrir aðra helgi. Þeir félagar gætu farið hraðar í uppskerustörfin en þurrkunin ræður för. Venjulega hefur Hermann ekkert farið að huga að hálminum fyrr en langt er liðið á haust en núna getur hann rúllað fáum dögum eftir þreskingu. Hálmurinn er vel þurr og sunnan blásturinn lýkur verkinu á stuttum tíma.

„Það er mjög gaman að eiga við þetta þegar veðrið leikur svona við okkur,“ segir Ari B. Hilmarsson, kornbóndi sem rekur þurrkstöð á Þverá í Eyjafjarðarsveit. Hann kveðst vera kominn vel á veg með þreskingu á eigin ökrum og uppskeran líti vel út. Sýnist honum að magnið geti verið um 5 tonn á hektara, það sem af er.

Hann setur kornið í stórsekki og fyllingin er svo góð að sekkir sem venjulega vega 750 kíló vega nú 950 kg. Munar þar 200 kílóum. Eyfirskir bændur nota mest sexraðabygg og fá því iðulega meiri uppskeru í góðum árum en sunnlenskir bændur sem nota tvíraðabygg en kornið er þó viðkvæmara fyrir veðrum.

Kornrækt hefur heldur verið að aukast í Eyjafirði og eru bændur almennt farnir að huga að þreskingu. Ari á von á því að eftir svona ár fjölgi þeim enn frekar og aðrir bæti við sig.

Nánari umfjöllun er að finna í Morgunblaðinu sem kom út 2. september.