Innlent | mbl | 19.10.2021 | 18:15 | Uppfært 20:20

Felldu tillögu um uppbyggingu 3.000 íbúða

Borgarstjórnarfundur stendur nú yfir í Ráðhúsi Reykjavíkur. mbl.is/Hallur Már

Tillaga borgarfulltrúa Sjálfstæðisflokksins um sérstaka flýtimeðferð til uppbyggingar 3.000 íbúða í Reykjavík var felld á fundi borgarstjórnar í dag. Þar var lagt til að byggðar yrðu 3.000 íbúðir í Keldnalandi, Keldnaholti, Úlfarsárdal og á BSÍ-reit.

Eyþór Arnalds Laxdal, oddviti sjálfstæðismanna í borgarstjórn, segir það hafa komið sér mest á óvart að borgarfulltrúar meirihlutans hafi verið í afneitun um þær tölur sem minnihlutinn hafi lagt fram.

Frétt af mbl.is

3.000 nýjar íbúðir án tafa

Láta eins og það sé blankalogn

„Það er engu líkara heldur en að meirihlutinn kannist ekki við þær tölur sem eru á markaðnum. Við erum að sjá 75% færri íbúðir til sölu í september á þessu ári heldur en fyrir tveimur árum síðan í Reykjavík. Auk 30% fækkunar í íbúðum sem eru að skila sér inn á markaðinn. Þetta er eins og sagt er á ensku: „Perfect storm“ en í umræðunni var eins og þau teldu að það væri blankalogn,“ segir í Eyþór í samtali við mbl.is.

Dagur B. Eggertsson borgarstjóri gaf lítið fyrir tillöguna þegar mbl.is náði tali af honum í gær og sagði hana „hefðbundið pólitískt útspil“ fremur en raunhæfa tillögu að úrbótum á húsnæðismálum í borginni.

Frétt af mbl.is

Miklabraut ráði ekki við byggð í Keldnalandi

Taldi tillöguna til þess fallna að vinda ofan af skortsstefnu

Á fundinum í dag gaf Eyþór lítið fyrir þess háttar rök á fundinum í dag: „Brýn þörf er á að fara í uppbyggingu hagstæðum byggingarreitum í Reykjavík. Tillaga um 3.000 íbúðir í Úlfarsárdal, Keldur og við BSÍ er hóflegt fyrsta skref til að vinda ofan af skortsstefnu sem hefur leitt til hærri húsnæðiskostnaðar í Reykjavík.“

Dagur sagði ekki unnt að flýta tillögum á uppbyggingu íbúabyggðar nema að framkvæmdum á borgarlínunni yrði flýtt: „Tilkoma borgarlínunnar gerir okkur kleift að þróa borgina á nýjan, spennandi og grænan hátt. Við erum með fjölda svæða sem eru næst í framkvæmd og sum hver búin að vera í skipulagi árum saman. Það er mjög mikilvægt að allir sameinist um að þróa og byggja hratt.“