Innlent | mbl | 29.12.2021 | 15:06

Sjálfsvígstíðni í faraldrinum liggur ekki fyrir

Alma sagði á fundinum að embættið væri með geðheilbrigðismál til skoðunar í ljósi umræðunnar. mbl.is/Kristinn Magnússon

Alma Möller landlæknir sagði á upplýsingafundi vegna kórónuveirunnar í dag að hún gæti ekki staðfest fjölda þeirra sem svipt hafa sig lífi á tímum faraldursins þar sem tölur ársins í ár lægju ekki fyrir.

Sjálfsvígstíðni ársins 2020 væri á pari við meðaltöl síðustu ára og landslæknisembættið væri með geðheilbrigðismál til skoðunar.

„Við birtum tölur um sjálfsvíg árlega. Tölurnar fyrir 2020 voru í hærri kantinum en ekki þær hæstu sem við höfum séð. Þær voru á pari við meðatöl síðustu ára,“ sagði Alma.

Lítið þýði verði til þess að tölurnar sveiflist mikið milli ára og því beri að horfa á tíu ára meðaltal.

„Við erum ekki komin með staðfestar tölur fyrir þetta ár,“ sagði Alma. Slíkt tæki nokkra mánuði.

Greint var frá því í sumar að 47 hefðu svipt sig lífi árið 2020. Í lok nóvember var greint frá því að samkvæmt bráðabirgðatölum hefðu 17 einstaklingar framið sjálfsvíg fyrstu sex mánuði árisins 2021.

Frétt af mbl.is

47 sjálfsvíg árið 2020

Með geðheilbrigðismál til skoðunar

Fyrr í vikunni birtist grein á vef Vísis þar sem Grímur Atlason, framkvæmdastjóri Geðhjálpar, og Sigrún Sigurðardóttir, dósent við HA og stjórnarkona í Geðhjálp, kölluðu eftir auknum aðgerðum í geðheilbrigðismálum í kjölfar heimsfaraldursins.

„Hvað veldur því að við sem samfélag tökum á faraldri sem hefur dregið samtals 37 til dauða á 22 mánuðum með þeim hætti sem við gerum? Á sama tíma hafa tæplega 100 manns tekið eigið líf,“ segir í greininni.

Alma sagði á fundinum, innt eftir viðbrögðum við greininni, að embættið væri með málefnið til skoðunar í ljósi umræðunnar.

„Það eru auðvitað í gangi ákveðnar forvarnaráætlanir og unnið markvisst að þeim,“ sagði hún. Þá hefði auknum fjármunum verið varið í geðheilbrigðismál frá því faraldurinn hófst.

Hún gæti þó ekki staðfest að tæplega 100 manns hefðu svipt sig lífi þar sem tala sjálfsvíga ársins í ár lægi ekki fyrir.

Embætti landlæknis bendir á að mikilvægt sé að þeir sem glíma við sjálfsvígshugsanir segi einhverjum frá líðan sinni, hvort sem er aðstandanda eða hafi samband við Hjálparsíma Rauða krossins 1717, eða á netspjalli 1717.is, við hjúkrunarfræðing í netspjalli á heilsuvera.is eða við ráðgjafa í síma Píeta-samtakanna s. 552-2218.

Píeta-samtökin bjóða einnig uppá ráðgjöf og stuðning fyrir aðstandendur þeirra sem glíma við sjálfsvígshugsanir.

Fyrir þau sem misst hafa ástvin í sjálfsvígi bendir landlæknisembættið á stuðning í sorg hjá Sorgarmiðstöðinni í síma 551-4141 og hjá Píeta-samtökunum í síma 552-2218.