Fimm tilraunir og vindmyllan stendur enn

Sprengju­sveit Land­helg­is­gæsl­unn­ar var feng­in í það verk­efni í dag að sprengja upp vind­myllu sem skemmd­ist í bruna á ný­árs­dag í Þykkvabæ. Ekki hef­ur tek­ist að fella vind­myll­una í fimm til­raun­um. Sprengju­sveit Gæsl­unn­ar er búin að vera svæðinu í níst­ingskulda frá því í há­deg­inu. 

Frétt­in hef­ur verið upp­færð eft­ir að fimmta til­raun mis­heppnaðist.

Ásgeir Marteins­son, stjórn­ar­formaður Há­blæs og um­sjón­ar­maður vind­myll­unn­ar, seg­ir mik­il­vægt að vind­myll­an verði felld af ör­ygg­is­ástæðum. Spaðar vind­myll­unn­ar snú­ast enn eft­ir brun­ann.

„Spaðarn­ir á henni snú­ast, hún er ekki í ör­uggu ástandi. Þeir gætu farið að snú­ast mjög hratt í roki og jafn­vel brotnað úr henni.“ 

„Það er ekki hægt að fara upp til þess að stoppa spaðanna, því allt er brunnið þarna uppi," seg­ir Ásgeir í sam­tali við mbl.is.

Báðar vind­myll­urn­ar brunnið

Tvær vind­myll­ur standa í Þykkvabæ og hafa þær báðar brunnið, önn­ur á ný­árs­dag og hin árið 2017. Ásgeir seg­ir ekki nauðsyn­legt að sprengja hina þar sem spaðar henn­ar snú­ast ekki.

Spurður hvað olli brun­an­um á ný­árs­dag tel­ur Ásgeir það lík­legt að brems­an í vind­myll­unni hafi gefið sig, spaðarn­ir farið að snú­ast ógn­ar­hratt út af roki á svæðinu og síðan hafi kviknað í.

„Ég held að það hafi gerst af því að þeim hafi ekki verið sinnt, þær hafa staðið kyrr­ar í mörg ár,“ seg­ir Ásgeir einnig og bætti því við að ekki sé al­gengt að það kvikni í vind­myll­um.

Áform eru um að tvær nýj­ar vind­myll­ur komi í stað þeirra eyðilögðu að sögn Ásgeirs.