Handtekinn eftir falska tilkynningu

Sérsveitin og lögreglan var kölluð til í vesturbæinn í kvöld, að því er lögreglan staðfestir við mbl.is. 

Tengjast aðgerðirnar máli sem lögreglan vinnur nú í ásamt sérsveitinni sem ekki er hægt að upplýsa um sem stendur, að sögn Guðmundar Péturs Guðmundssonar lögreglufulltrúa lögreglustöðvarinnar á Hverfisgötu. 

Mikið sírenuvæl heyrðist og fjöldi lögreglubíla auk tveggja sérsveitarbíla sáust á leið í miðbæinn laust fyrir sjö í kvöld.

Uppfært kl. 19.40:

Tilkynningin sem barst lögreglu var ekki á rökum reist og er talið að um gabb hafi verið að ræða en tilkynnandinn hefur verið færður í varðhald. Þetta kemur fram í stuttri fréttatilkynningu frá lögreglunni.

Tilkynnt um að karlmaður hafi verið skotinn

Um hálfsjöleytið í kvöld hélt lögreglan að húsi í vesturbæ Reykjavíkur eftir að tilkynning barst um að innandyra væri karlmaður, sem hefði verið skotinn og með mikla áverka – í kjölfarið héldu lögreglumenn á staðinn og sérsveit lögreglustjóra einnig strax kölluð til.

Á vettvangi var hins vegar engan slasaðan mann að finna. Lauk málinu með þeim hætti að tilkynnandinn var því handtekinn og færður á lögreglustöð.

• 1 blogg um fréttina

Bloggað um fréttina

• Jóhannes Ragnarsson: Tilkynntu um generalfyllirí og blóðug slagsmál á frystihúslofti