Föst í lyftu yfir nótt

Í nótt átti sá óheppilegi atburður sér stað að tveir einstaklingar festust í lyftu í íbúðablokk í Kópavogi. Þetta kemur fram í færslu á facebook-síðu slökkviliðsins á höfuðborgarsvæðinu nú í morgun.  

Í samtali við mbl.is segir Ásdís Gíslason, upplýsingafulltrúi slökkviliðsins, að um tvo einstaklinga hafi verið að ræða sem fóru í lyftuna í gærkvöldi, en lyftan hafi stöðvast. Hvorugur þeirra hafði  hleðslu á símanum sínum og þá hafi öryggisbjalla lyftunnar ekki virkað. Því hafi þau þurft að dúsa í lyftunni í nótt og vonast til þess að aðrir íbúar blokkarinnar myndu þurfa að nota lyftuna eða taka eftir biluninni.

Í morgun hafi aðrir íbúar svo uppgötvað að lyftan bilaði um nóttina og því hafi slökkviliðið verið kallað á vettvang. Eflaust hefur það komið öðrum íbúum hússins á óvart að í lyftunni hafi verið einstaklingar þegar lyftan var komin í lag. Segir Ásdís að þeir sem í lyftunni voru hafi orðið frelsinu fegin og hafi gengið heil og hraust úr lyftunni. Ekki hafi verið um börn eða aldraða einstaklinga að ræða.

Kópavogur Kópavogsbær mbl.is/Hjörtur

• 1 blogg um fréttina

Bloggað um fréttina

• Ómar Ragnarsson: Sums staðar eru lyftur með "dauðan farsímablett".