Friður kominn á í Hvalfirði

Allt gekk að óskum þegar lendingaræfing bandarískra landgönguliða fór fram morgun í Hvalfirði í glampandi sól. Henni lauk nú rétt fyrir hádegi.

Aðgerðin sem er hluti af varnaræfingunni Norður-Víkingur, fór fram á Miðsandi í innanverðum firðinum. Nokkur hundruð tóku þátt í henni en alls koma á annað þúsund manns að varnaræfingunni í heild sinni.

Frétt af mbl.is

Gná lauk björgunaræfingu upp á eigin spýtur

Skoðuðu sig um á meðan æfingin fór fram

Vopnaðir landgönguliðar komu á land af skipi bandaríska sjóhersins, sem var statt í minni Hvalfjarðar, með tveimur þyrlum og tveimur svifnökkvum. 

Þeir sem komu af svifnökkvunum fóru á land á bryndrekum en áhöfn þyrlunnar fór á tveimur jafnfljótum. Förinni var heitið að skýlum sem voru í grennd við lendingarstaðina þar sem landgönguliðar æfðu árás.

Landgönguliðar á leið að skýlinu eftir lendingu. mbl.is/Árni Sæberg

Gafst gestum þá tækifæri til að skoða um borð í svifnökkvunum en fulltrúum utanríkisráðuneytisins og bandaríska sendiráðsins var m.a. boðið að koma og fylgjast með.

Frétt af mbl.is

Á annað þúsund manns taka þátt í heræfingu

Mótmælendur ekki sjáanlegir

Samtök hernaðarandstæðinga höfðu skipulagt mótmæli í grennd við svæðið þar sem æfingin fór fram. 

Mótmælendur voru þó hvergi sjáanlegir þegar blaðamann mbl.is bar að garði enda mikill viðbúnaður og strangt eftirlit með svæðinu.

• 1 blogg um fréttina

Bloggað um fréttina

• Ómar Ragnarsson: Norður-Víkingur NATO 1999: Æfð árás á náttúruverndarfólk á hálendinu.