„Kósí“ heimaveður í kvöld

Spáð er austlægri átt í dag, golu eða kalda og skúrum á sunnanverðu landinu, einkum austantil. Dálítil snjókoma verður í fyrstu norðaustanlands, annars úrkomulítið norðan heiða. Hlýnandi, hiti 5 til 10 stig síðdegis. Austan strekkingur í kvöld, með rigningu sunnanlands.

Þetta kemur fram í hugleiðingum veðurfræðings.

„Akkúrat núna er fínasta veður á vesturhluta landsins,“ segir Marcel de Vries, veðurfræðingur hjá Veðurstofu Íslands. Hann bendir þó á að eftir hádegi er því spáð að það þykkni upp og verði örlítil úrkoma fyrir sunnan- og suðvestan og auk þess mun hvessa svolítið. Það verður þó þurrt að kalla fyrir norðan.

Sólin fer á hádegi

Sól er víða yfir landinu þennan morguninn en samkvæmt Marcel er henni ekki ætlað að vera nema fram að hádegi á sunnanverðu landinu.

Úrkoma sem nú er yfir austan mun færast yfir landið í dag en það bætir í úrkomu suðaustan til um hádegi.

Þeir sem vilja kjósa í sólinni á höfuðborgarsvæðinu og á sunnanverðu landinu þurfa því að hafa hraðar hendur.

Verður þá kannski ekki stemningsveður í kvöld fyrir kosningavökur og Eurovision-partí?

„Er ekki bara flott að vera í kósí heima og horfa á Eurovision þegar það er að rigna?“

Veðurvefur mbl.is

• 1 blogg um fréttina

Bloggað um fréttina

• Ómar Ragnarsson: Þegar meirihlutinn hékk á fáum atkvæðum áratugum saman.