Innlent | mbl | 7.10.2022 | 11:16

Ganga sátt frá borði

Ásdís Kristjánsdóttir segir að ríkur vilji og einhugur hafi verið hjá bænum að leysa húsnæðismál HSSK. Samsett mynd

Kópavogsbær gengur sáttur frá borði eftir að hafa samþykkt kaup á tveimur lóðum þar sem Hjálparsveit skáta (HSSK) hefur verið með aðstöðu á Kársnesi.

Frétt af mbl.is

Kaupir lóðir af skátunum á 790 milljónir

Lóðirnar kosta 790 milljónir króna, að frádregnu virði annarrar lóðar sem hjálparsveitin fær í staðinn úthlutað frá bænum.

Einhugur hjá bænum

Ásdís Kristjánsdóttir, bæjarstjóri Kópavogsbæjar, segir að ríkur vilji og einhugur hafi verið hjá bænum að leysa húsnæðismál HSSK, enda gegni starfsemi þeirra „gríðarlega mikilvægu hlutverki í almannavörnum í sveitarfélaginu“.

Fyrirhuguð uppbygging á Kársnesi og tilkoma borgarlínu geri það aftur á móti að verkum að starfsemi HSSK fari betur annars staðar.

Tveir valkostir

Ásdís segir að bæjarstjórn Kópavogs hafi í mars í fyrra skipað starfshóp um húsnæðismál HSSK og hann hafi skilað niðurstöðu í janúar síðastliðnum. Tveir valkostur voru tilgreindir þar, annars vegar að byggja húsnæði á lóðinni Tónahvarf 8 og hins vegar að kaupa nýbyggingu á lóðinni Turnahvarf. Upphæðin (790 milljónir) hafi verið samþykkt af bæjarstjórn Kópavogs síðar á þessu ári til kaups á húsnæði fyrir HSSK að Turnahvarfi 2 sem stóð til boða og var þá metin hagkvæmari lausn en að byggja nýtt hús í Tónahvarfi 8 en þeirri lóð hafði bærinn ekki úthlutað.

Hjálparsveit skáta í Kópavogi. mbl.is/Kristinn Magnússon

„Samningar milli HSSK og eiganda að Turnahvarfi 2 gengu svo ekki eftir og óskuðu HSSK því eftir að fá að byggja hús í Tónahvarfi 8 og fá til þess jafn háa upphæð og áður hafði verið gefið vilyrði til þegar stefnt var að kaupum á húsnæði. Tónahvarfið er einnig hentug staðsetning og svarar betur þörfum björgunarsveitarinnar heldur en núverandi staðsetning en [björgunarsveitin] verður áfram með bátaaðstöðu á Kársnesi,“ segir Ásdís í svari við fyrirspurn mbl.is, en virði lóðarinnar í Tónahvarfi er um 100 milljónir króna.

500 millljóna króna virði

Hún nefnir jafnframt að virði lóðanna sem Kópavogsbær fær í staðinn við sölu byggingaréttar sé um 500 milljónir króna, samkvæmt greiningu Eflu verkfræðistofu sem var unnin fyrir bærinn fyrr á árinu. Við þá upphæð muni bætast við árlegar útsvarstekjur þegar byggt hafi verið á lóðunum, eða um 100 milljónir á ári samkvæmt sömu greiningu.

Kársnes í Kópavogi. mbl.is/Sigurður Bogi Sævarsson

Spurð hvort þessar 790 milljónir króna teljist eðlilegt markaðsverð svarar Ásdís: „Fyrir þetta verð fáum við verðmætt byggingarland á þróunarsvæði og getum um leið tryggt aðstöðu fyrir HSSK, þannig að við göngum sátt frá borði.“ Bætir hún við að almennt líti Kópavogsbær til markaðsvirðis við kaup á fasteignum.

Ætlar bærinn að kaupa fleiri lóðir í tengslum við lagningu borgarlínu?

„Þegar endanleg lega borgarlínu liggur fyrir mun fara fram greining á því hvort nauðsynlegt verður að leysa til sín lóðir eða lóðarhluta,“ segir Ásdís.