Hefur fengið stuðning í forsetaframboð
Setja bókamerki
Kristján Þórður Snæbjarnarson, forseti Alþýðusambandsins, kveðst ekki hafa tekið ákvörðun um hvort hann bjóði sig fram á þingi ASÍ í embætti forseta í kjölfar fregna gærdagsins. Hann hefur þó fengið stuðningsyfirlýsingar um slíkt framboð.
Þingið hefst að nýju klukkan 10 í dag og samkvæmt upphaflegri dagskrá verða greidd atkvæði um hverjir munu fara með forystu sambandsins klukkan 13. Dagskráin hefur þó riðlast nokkuð til. „Í öllu falli er lagt til með að það verði eftir hádegi,“ segir Kristján.
Ragnar Þór Ingólfsson, formaður VR, Sólveig Anna Jónsdóttir, formaður Eflingar, og Vilhjálmur Birgisson, formaður Starfsgreinasambandsins og Verkalýðsfélags Akraness drógu öll framboð sín í embætti forseta, 2. og 3. varaforseta ASÍ til baka í gær.
Fréttirnar hafa valdið miklum usla og sett þing ASÍ í uppnám.
„Ég náði ekki að sofa nógu vel á því“
Í viðtali við mbl.is í gær sagðist Kristján þurfa að íhuga stöðu sína og framboð eftir fréttir dagsins.
„Ég þarf bara að sjá hvað gerist núna á eftir þegar við byrjum og hvernig við náum að vinna með þetta. Ég náði ekki að sofa nógu vel á því,“ segir Kristján spurður hvort einhver ákvörðun liggur fyrir varðandi þessi atriði.
Óttastu að fleiri dragi sig út úr sambandinu í kjölfar frétta gærdagsins?
„Ég svo sem er ekkert að hugsa um það núna. Verkefnið núna er að reyna að finna leiðirnar fram á við þannig að sambandið gangi áfram en auðvitað þegar þetta fer allt af stað þá fer ýmislegt að gerast.“
Hefur þú íhugað að bjóða þig fram í formann?
„Ég hef svo sem ekkert íhugað það mikið. Ég hef fengið stuðningsyfirlýsingar um það en hef ekki tekið neina ákvörðun um slíkt.“
„Þar liggur umboðið hjá aðildarfélögunum“
Eftir að hafa dregið framboð sitt til baka sagði Vilhjálmur Birgisson ASÍ algjörlega óstarfhæft enda væru langstærstu félögin farin þar út og að Alþýðusambandið væri umboðslaust.
Spurður út í þessi ummæli sagði Kristján þingið vera æðsta vald sambandsins og hefði umboð til að ræða þau málefni sem fram fara á þinginu.
„En ef við erum að tala um önnur mál, þar sem við vorum að reyna að teikna upp í aðdraganda þingsins að koma sterkari saman í öðrum málum og kjarasamningum, þar liggur umboðið hjá aðildarfélögunum. Það er alveg ljóst,“ segir hann.
Skoða hvort Hvalur 8 og 9 geti hitað upp Suðurnes
Telja sig geta rekið Grindavík til 2026
Nokkrar skriður féllu á Vestfjörðum
Jón „mun ekki koma nálægt meðferð hvalamálsins“
Ránið var framið í strætóskýli
Komið „meira púður“ í viðræðurnar
Vandræði með vatn í Bolungarvík
