Innlent | mbl | 11.3.2023 | 17:45 | Uppfært 21:36

„Við mótmælum þessu harðlega“

Þór Sigurgeirsson, bæjarstjóri Seltjarnarnesbæjar, hefur áhyggjur af fyrirhuguðum framkvæmdum við Ánanaust. Samsett mynd

„Það er sífellt þrengt að okkur og verið að hægja á umferð þarna þannig að við höfum talsvert miklar áhyggjur af þessu og við mótmælum þessu harðlega,“ segir Þór Sigurgeirsson, bæjarstjóri Seltjarnarnesbæjar, um fyrirhugaðar breytingar á gönguþverun yfir Ánanaust.

Frétt af mbl.is

Vilja brottnám hringtorgs í Vesturbænum

Fulltrúar meirihlutaflokkanna í umhverfis- og skipulagsráði Reykjavíkur bókuðu að til framtíðar væri æskilegt að breyta hringtorginu við JL-húsið í klassísk ljósastýrð T-gatnamót.

Tillaga um endurbætur á umræddu svæði barst frá skrifstofu samgöngustjóra og borgarhönnunar. Í greinargerð samgöngustjóra kemur fram að Vegagerðin og Reykjavíkurborg hafi unnið að tillögunni í sameiningu með það að markmiði að bæta umferðaröryggi og aðgengi gangandi og hjólandi vegfarenda.

„Við viljum vera með í ráðum“

Ekki hefur verið rætt við bæjarstjórn Seltjarnarnesbæjar í tengslum við framkvæmdirnar enn sem komið er.

„Við viljum vera með í ráðum í svona veigamiklum breytingum og munum koma okkar athugasemdum á framfæri varðandi þetta,“ segir Þór.

Telur hann að framkvæmdirnar muni koma til með að hafa neikvæð áhrif á íbúa á Seltjarnarnesi.

„Við höfum miklar áhyggjur af þessu og viljum gjarnan fá einhverjar skýringar á þessu og hvort það sé möguleiki á að við séum höfð með í ráðum þegar svona er tilkynnt. Við þurfum að sækja vinnu og þjónustu í höfuðborginni eins og aðrir og komast heim líka, þannig að við þurfum að fá að vera við borðið.“

Munu ræða við borgina

Spurður hvort bæjarstjórnin muni setja sig í samband við Reykjavíkurborg svarar Þór játandi.

„Það er á dagskrá að koma okkar skoðunum á framfæri við borgina og komast að borðinu og fá að vera með í ráðum með einhverjum hætti. Það þarf að hugsa þetta heildstætt og borgin verður líka að hugsa um sína nánustu nágranna. Við þurfum að vinna þetta allt í sátt og samlyndi.“

Seltirningar hafa áður mótmælt framkvæmdum Reykjavíkurborgar án samráðs við bæinn.