Fólk í góðu formi fái skattaívilnun

Frétt þessi er aprílgabb mbl.is

Í heilbrigðis- og landvarnakafla nýrrar fjármálaáætlunar stjórnvalda er kveðið á um hækkun persónuafsláttar þeirra skattgreiðenda sem staðist geta tilteknar kröfur eða viðmið um heilbrigði og hreysti.

Í greinargerð með drögum að fjármálaáætlun sem nú liggur fyrir Alþingi er m.a. vísað til nýlegrar úttektar Heimssamtaka um málefni offitu (WOF) þar sem kom fram að ofþyngd er vaxandi vandamál á Íslandi og áætlað að hlutfall feitra einstaklinga fari vaxandi um 2,2% árlega. Leiddi úttekt WOF einnig í ljós að á Íslandi muni kostnaður heilbrigðiskerfisins vegna kvilla sem stafa af offitu aukast um 66% fram til ársins 2035.

Er það niðurstaða fjármálaáætlunar að hagkvæmt sé fyrir ríkissjóð að skapa sterka fjárhagslega hvata fyrir landsmenn að vera í góðu líkamlegu ásigkomulagi og er því ætlunin að tengja persónuafslátt einstaklinga við frammistöðu þeirra í þrekprófi sem byggir á styrktar- og þrekkröfum Bandaríkjahers (e. Army Combat Fitness Test, ACFT).

10 armbeygjur lágmark

Er þrekprófinu skipt í sex hluta og mælir það m.a. hve margar armbeygjur einstaklingur getur framkvæmt á tveimur mínútum, og hve hratt hann hleypur 3.200 metra vegalengd, en stigagjöf í prófinu tekur mið af aldri og kyni.

Eru t.d. lágmarskröfur (60 stig) fyrir bæði kyn og alla aldurshópa að geta lokið 10 armbeygjum. Karlmenn á aldrinum 17-21 ára þurfa að klára hlaupaprófið á innan við 21 mínútu til að ná lágmarki en karlar á fimmtugsaldri myndu hafa nærri 23 mínútur til að koma í mark.

Allt að þreföldun persónuafsláttar

Munu þeir sem standast ACTF geta sótt um aukningu persónuafsláttar í hlutfalli við stigagjöf. Þeir sem fullnægja lágmarskröfum eiga þá rétt á tvöföldun persónuafsláttar úr 59.665 kr. í 119.330 kr. mánaðarlega en með fullt hús stiga (100 stig) fæst persónuafslátturinn þrefaldaður upp í 178.995 kr. mánaðarlega.

Þeir sem ekki geta staðist prófið eiga þess kost að sækja sérstök námskeið sem verða í boði hjá líkamsræktarstöðvum sem jafnframt munu annast framkvæmd ACFT-prófsins fyrir hönd embættis skattstjóra.

Segir enn fremur í greinargerð að með því að nota ACFT sem viðmið megi búa í haginn fyrir mögulega stefnubreytingu í varnarmálum Íslands. Lífleg umræða hefur átt sér stað undanfarnar vikur og mánuði um þörfina á að stofna íslenskan her eða viðbúnaðarsveitir, en hernaðar- og lýðheilsusérfræðingar hafa bent á að á Íslandi líkt og hjá flestum vestrænum þjóðum sé meirihluti ungs fólks ófær um að fullnægja þeim lágmarskröfum sem heraflar NATO-ríkjanna gera hvað snertir hreysti nýliða.

Skotleikir og bardagalistir líka metin

Er jafnframt lagt til í greinargerð að þeir sem ekki geti þreytt ACFT prófið geti í staðinn sýnt fram á getu sína á öðrum sviðum sem hafa tengingu við hernaðar- og landvarnamál. Þannig megi leggja að jöfnu við ACFT-prófið þátttöku í starfi skotfélags, eða íþróttfélags sem kenna bardagalistir á borð við muay thai, karate eða bændaglímu.

Sama mun gilda um þá sem sýnt geta fram á góðan árangur í tölvuleikjum sem snúast um herkænsku, og í skotleikjum á borð við Call of Duty og Counter-Strike.

Nánari upplýsingar um hvernig sækja má um hækkun frítekjumarks, og hvaða gögnum þarf að framvísa, hafa verið birtar í sérstakri upplýsingagátt á vef dómsmálaraðuneytisins sem annast mun nánari útfærslu.

• 1 blogg um fréttina

Bloggað um fréttina

• Geir Ágústsson: Þegar raunveruleikinn er fjarstæðukenndari en skáldskapur