Gætu rofið 400 þúsunda múrinn á árinu

Landsmönnum hefur fjölgað ört á síðustu mánuðum og misserum. Þjóðskrá hefur að undanförnu birt á vefsíðu sinni tölur um fjölda íbúa á landinu og uppfært þær tölur einu sinni á hverjum sólarhring.

Í gær voru landsmenn orðnir alls 394.228 talsins samkvæmt upplýsingum Þjóðskrár og ljóst af fjölguninni að undanförnu að styttist óðum í að 400 þúsund íbúa markinu verði náð með sama áframhaldi. Frá 1. desember til 1. júlí sl. fjölgaði íbúum á landinu öllu um 6.784 eða um 1,8%. Haldi fólksfjölgunin áfram með sama hraða á komandi mánuðum má gera því skóna að íbúar landsins verði orðnir 400 þúsund talsins 1. desember næstkomandi.