Innlent | Morgunblaðið | 12.7.2023 | 7:41

Framtíð Úkraínu liggur í NATO

Gitanas Nauseda, forseti Litháens, býður Katrínu Jakobsdóttur velkomna á leiðtogafund Atlantshafsbandalagsins í Vilníus í gær, en til hægri er Jens Stoltenberg, framkvæmdastjóri NATO. AFP/Odd Andersen

Leiðtogar Atlantshafsbandalagsríkjanna eru á einu máli um að framtíð Úkraínu liggi í varnarbandalaginu, en á hinn bóginn var ekkert kveðið á um það í hve nálægri framtíð það gæti orðið, sem Úkraínumönnum þykir verra. Þetta kom fram á leiðtogafundi NATO í Vilníus, sem lýkur í dag.

„Ég held að í heilu tekið sé þetta mjög skýr útkoma fyrir Úkraínu, mjög einbeittur stuðningur við að hún gangi í NATO í fyllingu tímans,“ segir Katrín Jakobsdóttir forsætisráðherra í samtali við Morgunblaðið frá Vilníus.

„En meðan Úkraína á í stríði getur hún ekki gengið í NATO, svo það er erfitt að gefa upp nákvæmar tímasetningar.“

Frétt af mbl.is

Selenskí er mættur

Breytir stöðu Norðurlanda í álfunni

Katrín segir að mikil ánægja hafi ríkt á fundinum, ekki síst meðal Norðurlandaþjóða, um að innganga Svía í NATO hafi loks verið tryggð. Það breyti jafnframt stöðu Norðurlanda í álfunni.

„Þetta eru þær þjóðir sem við vinnum nánast með og viðbúið að við ræðum öryggis- og varnarmál meira í okkar hópi,“ segir Katrín.

Viðtalið við Katrínu Jakobsdóttur forsætisráðherra má lesa í heild sinni í Morgunblaðinu í dag, miðvikudag.