Ástand vegarins líklega ekki orsök slyssins

Lögreglan á Vesturlandi telur að ástand Snæfellsnessvegar hafi ekki verið ástæða banaslyssins í umferðinni sem varð við Hítará í gær.

Við færslu á Facebook-síðu lögreglunnar á Vesturlandi, þar sem greint var frá slysinu í gær, var birt athugasemd þar sem einstaklingur benti á að það hefði orðið vart við malbiksblæðingar víða á Mýrunum í gær.

Í samtali við mbl.is segir lögreglan að blæðingar séu ekki meiri á þessum vegarkafla en gengur og gerist í vegakerfinu. Því sé ástand vegarins ekki rannsakað sem sérstakur orsakaþáttur.

Frétt af mbl.is

Banaslys við Hítará

G. Pétur Matthíasson, upplýsingafulltrúi Vegagerðarinnar, tekur undir þetta mat lögreglu.

Nú hafa orðið þrjú banaslys með stuttu millibili í umferðinni og virðist fyrsta skoðun leiða það í ljós að ástand vega hafi ekki verið afgerandi ástæða í neinu þeirra tilvika.

Þrjú banaslys í júlí

Fyrr í þessum mánuði lést ökumaður vélhjóls er hann lenti utan vegar við Laugarvatnsveg. Ungur ökumaður lét svo lífið í bílveltu á Þrengslavegi í síðustu viku. Loks var alvarlegt bílslys við Hítará í gær þar sem einn lést og nokkrir slösuðust.

G. Pétur segir í samtali við mbl.is að vegakerfið sé í stakk búið til þess að taka á móti töluverðri umferð. Aukinni umferð fylgi þó alltaf meiri slysahætta.

Vegagerðin vilji þó gjarnan komast í verkefni til að bæta umferðaröryggi, svo sem í fækkun einbreiðra brúa og í verkefni sem snúa að breikkun og styrkingu vega og í það að bæta slitlagið. Stjórnvöld hafi skilning á því að bæta þurfi innviði til að taka á móti auknum fjölda ferðamanna og Vegagerðin skilji sömuleiðis að ekki sé endalausu fé til að dreifa.

Frétt af mbl.is

Ungi ökumaðurinn látinn

Frétt af mbl.is

Ökumaður vélhjólsins látinn

• 1 blogg um fréttina

Bloggað um fréttina

• Birgir Örn Guðjónsson: Umferðin.