„Þetta er árás á tjáningarfrelsi“
Inga Þóra Pálsdóttir Ragnhildur Helgadóttir
Setja bókamerki
Sabine Leskopf, borgarfulltrúi Samfylkingarinnar, segir tjáningarfrelsi Þjóðverja sem styðja Palestínu í átökunum við Ísrael skert.
Hún segir dæmi þess að fólki hafi verið sagt upp starfi eftir að hafa birt Facebook-færslur til stuðnings Palestínu. Þá hafi ýmsir þýskir stjórnmálamenn, bæði hægri- og vinstrimenn, viðrað þá hugmynd hvort hægt sé að hafna umsóknum um ríkisborgararétt frá einstaklingum sem hafa gagnrýnt stjórnvöld í Ísrael. Að sögn Sabine er jafnvel hin minnsta samkennd með Palestínu túlkað sem gyðingahatur.
„Þetta er árás á tjáningarfrelsi,“ segir Sabine í samtali við mbl.is.
Hrædd við að vera stimpluð sem hryðjuverkamenn
Sabine, sem er þýsk en hefur búið á Íslandi í 23 ár, segir þennan mikla stuðning Þjóðverja við Ísrael að einhverju leyti skiljanlegan þar sem það þyki einstaklega slæmt að vera kallaður gyðingahatari þar í landi í ljósi sögunnar. Hún telur þó mikilvægt að horfa gagnrýnum augum á ástandið.
„Maður hefur miklar áhyggjur af fólki af arabískum uppruna sem býr hér og fær ekki að tjá sig. Það er hrætt við að tjá sig á samfélagsmiðlum og taka þátt í umræðunni og vera strax stimplað sem hryðjuverkamaður,“ segir Sabine.
Sabine nefnir þó að gyðingahatur sé að færast í aukana í Þýskalandi. Hún telur það einnig vera mikið áhyggjuefni og nefnir að lögreglumenn séu alltaf á vakt fyrir framan bænahús gyðinga.
Einsleitur fréttaflutningur
Sabine segir lögreglu hafa afskipti af fólki sem ber fána Palestínu á almannafæri og að mótmæli séu annað hvort bönnuð eða leyst upp um leið og ákveðinn fjöldi mætir. Hún segir þó að ekki sé hægt að líða ofbeldisfull mótmæli eins og brutust út í Berlín á fimmtudaginn.
Þar særðust 65 þýskir lögregluþjónar eftir að hafa verið kallaðir út á samstöðufund með Palestínumönnum. Lögregluþjónarnir særðust eftir steinakast, eldfiman vökva og annars konar andspyrnu af hálfu mótmælenda.
Sabine bendir einnig á að fréttaflutningur þýskra miðla af mótmælum til stuðnings Palestínu sé mjög neikvæður. Þá bjóði flestir þýskir fréttaskýringarþættir einungis stuðningsfólki Ísraels í umræður um átökin og sé fréttaflutningurinn því mjög einsleitur.
Koma fyrstu tölur á sunnudagskvöldið?
„Við vöknuðum við hljóð frá sprengingum“
Fundur hafinn hjá kennurum, ríki og sveitarfélögum
Létu lofthræðsluna ekki á sig fá
Ekki hægt að slá gosið út af borðinu strax
Heimildarmenn tala um hápólitískt drama
Rannsókn á menningarnæturmáli lokið