Björgun dýra í Grindavík ekki í forgangi

Dýraverndarsamband Íslands hefur fengið þær upplýsingar að björgun dýra í sjálfheldu í Grindavík sé metin út frá forgangsröðun verðmæta og sé samkvæmt því ekki í fyrsta forgangi af hálfu almannavarna. 

Kemur þetta fram í tilkynningu sem sambandið sendi frá sér rétt í þessu. 

Um er að ræða sauðfé í nokkrum fjárhúsum sem er innilokað og orðið bæði fóðurlaust og vatnslaust. Tvö fjárhús eru í bænum sjálfum.

Frétt af mbl.is

Um 240 kindur enn innilokaðar í Grindavík

Dýraverndarsambandið bendir á í tilkynningu sinni að skv. lögum um velferð dýra nr. 55/2013 er hverjum þeim er vart verður við dýr í neyð skylt að koma þeim til bjargar.

Bændur fá engin svör

Samkvæmt upplýsingum sambandsins hafa bændur ekki fengið neinar upplýsingar um hvenær þeir geti komið vatni og fóðri til dýranna.

Grétar Jónsson, bóndi á svæðinu, segir engar upplýsingar að fá. Hann gagnrýnir það að mikið af fólki sé á staðnum en bændur fá engin svör. „Þó það væri ekki nema bara það að fá björgunarsveitarfólk til að gefa dýrunum, sem hefur verið án vatns og matar í langan tíma núna,“ bætir hann við. 

• 1 blogg um fréttina

Bloggað um fréttina

• Torfi Kristján Stefánsson: Dýraníð