Innlent | mbl | 31.1.2024 | 11:30

Myndi leyfa Palestínu að keppa í Eurovision

„Það er fullkomlega málefnalegt að setja út á að við séum að taka þátt í keppni þar sem Ísraelum hefur ekki verið meinuð þátttaka með hliðsjón af því fordæmi sem sett var með banni við þátttöku Rússlands.“

Þetta segir Dagbjört Hákonardóttir í umræðu í Spursmálum þar sem þátttaka Íslands í Eurovision barst í tal.

Ósanngjarn samanburður

Spurði þáttastjórnandi þá út í hvort þarna væri ekki um ósambærileg mál að ræða.

„Af hverju ætti það að vera það," segir Dagbjört og bregst við.

- Rússar urðu ekki fyrir árás Úkraínumanna áður en þeir hófu aðgerðir í Úkraínu.

„Við getum alveg verið með það á hreinu að Eurovision er rammpólitísk keppni. Hún hefur verið það síðan hún var fyrst haldin í Sviss árið 1956. Það er bara alveg ljóst að það að halda friðinn er pólitísk ákvörðun og að vilja það og stuðla að því. Þegar ein þjóð sem keppir í Eurovision á þeim grundvelli að ætla sér að vinna þar til verðlauna fyrir besta framlagið þá erum við samt að velja það að horfa fram hjá því að hún á í stríði við undirokaða þjóð, sem ég vil kalla þjóð, og sem mér finnst bara ekkert skrítið að sett sé út á þátttöku Íslands í keppninni af þeim sökum. Og þetta er langt í frá bara til umræðu á Íslandi.“

Styddi þátttöku að sjálfsögðu

- En myndir þú styðja þátttöku Palestínu í keppninni ef það kæmi til greina?

„Að sjálfsögðu. Eða ég meina....“

- Þrátt fyrir hryðjuverkin sem voru framin 7. október?

„Heyrðu. Við höfum bara viðurkennt Palestínu. Ég ætla ekki að. Þetta er bara óraunverulegur raunveruleiki. Get eiginlega ekki svarað því með neinum vitrænum hætti hér og nú.“

- Þannig að ríkið sem fremur hryðjuverkið það má taka þátt í keppninni en ekki ríkið sem bregst við.