Innlent | mbl | 18.4.2024 | 15:45

Kíghósti hefur breiðst út um höfuðborgarsvæðið

Horft yfir höfuðborgarsvæðið. Mynd úr safni. mbl.is/Hari

Kíghósti hefur greinst hjá nokkrum ótengdum einstaklingum á höfuðborgarsvæðinu. Sumir þeirra hafa verið með einkenni frá því í mars en aðrir skemur.

Ljóst er að sýkingin hefur náð útbreiðslu, að minnsta kosti á höfuðborgarsvæðinu.

Þetta kemur fram í tilkynningu frá heilsugæslu höfuðborgarsvæðisins.

Kíghósti er öndunarfærasýking sem er algengust hjá börnum, einkum á fyrstu mánuðum ævinnar. Hjá unglingum og fullorðnum birtist sjúkdómurinn sem langvarandi og þrálátur hósti.

Samkvæmt þekkingarvef Heilsuveru eru einkenni kíghósta eftirfarandi:

Vægt kvef
Vaxandi hósti
Slímsöfnun og slæm hóstaköst, sérstaklega á næturnar

Eftir um það bil tvær vikur færast einkennin í vöxt með áköfum hóstaköstum og fylgir þeim einkennandi soghljóð við innöndun. Síðari einkenni eru:

Hnerri
Nefrennsli
Hiti
Einkenni sjúkdómsins geta verið til staðar í allt að 10 vikur.

Með sjúkdóminn í 2-3 vikur

Smit berst milli manna með úða frá öndunarfærum, til dæmis með hnerra. Meðgöngutími sjúkdómsins er yfirleitt um 2 til 3 vikur.

Ung börn, sérstaklega börn innan eins árs, geta orðið alvarlega veik. Fullbólusettir einstaklingar veikjast sjaldan alvarlega en geta fengið langvinnan og hvimleiðan hósta, enda er kíghósti einnig nefndur „hundrað daga hósti“.

„Ef grunur leikur á kíghóstasmiti er fólki af landinu öllu bent á að heyra í Upplýsingamiðstöð Heilsugæslu höfuðborgarsvæðisins í síma 1700 eða á netspjalli Heilsuveru til að fá ráðleggingar um viðbrögð,“ segir í tilkynningu heilsugæslunnar.

Þurfa að draga úr umgengni við ungbörn

Kíghósti er öndunarfærasýking sem er algengust hjá börnum, einkum á fyrstu mánuðum ævinnar. Hjá unglingum og fullorðnum birtist sjúkdómurinn sem langvarandi og þrálátur hósti.

Einstaklingar með kíghósta þurfa að draga eins og kostur er úr umgengni við ungbörn í um tvær vikur ef innan við 10 ár eru frá því viðkomandi var bólusettur eða lengur ef lengra er frá bólusetningu. Mikilvægt er að þau sem smitast haldi sig heima á meðan veikindin ganga yfir.

Sýklalyf gagnast sjaldan til að draga úr veikindum vegna kíghósta en er beitt í einstaka tilfellum, til að mynda ef sýkingin veldur bráðri lungnabólgu.

Frétt af mbl.is

Kíghósti breiðist út í Tékklandi: Þrír látnir

Bólusetningar mikilvægar

„Bólusetning móður á meðgöngu dregur úr hættu á að börn undir 6 mánaða aldri veikist alvarlega og bólusetning samkvæmt áætlun fyrir ungbörn viðheldur svo vörninni næstu 6 mánuði eftir það. Endurtekin bólusetning er nauðsynleg til að viðhalda markvissu viðnámi gegn kíghósta, jafnvel hjá þeim sem hafa fengið kíghósta,“ segir í tilkynningunni.

„Mælt er með bólusetningu á 10 ára fresti eftir almennar barnabólusetningar, þegar tilefni gefst. Starfsfólk heilbrigðisstofnana sem sinnir börnum og aðrir sem umgangast börn undir 1 árs á næstu mánuðum ættu að sækjast eftir bólusetningu ef 10 ár eða fleiri eru liðin frá síðasta skammti.

Bólusetning á meðgöngu miðast að því að vernda barnið og því er mælt með henni á hverri meðgöngu til að verja hvert barn fyrir sig. Þær bólusetningar verja einnig móðurina við kíghósta eftir meðgöngu.“