Kristrún varar flokksmenn við kæruleysi
Setja bókamerki
Kristrún Frostadóttir formaður Samfylkingarinnar segir flokkinn vera merkisbera jafnaðarstefnu á Íslandi og varar flokksmenn við því að sofna á verðinum þótt flokkurinn hljóti mikinn meðbyr samkvæmt nýjustu könnunum.
Þetta kom fram í ræðu Kristrúnar á flokkstjórnarfundi Samfylkingarinnar sem var haldinn fyrr í dag.
Engin innistæða fyrir kæruleysi
Kristrún sagði fjölda fólks víðs vegar um landið vonast til þess að Samfylkingunni takist að endurreisa velferðarkerfið, lyfta innviðum landsins og að: „Okkur takist að rífa hlutina í gang og koma Íslandi aftur á rétta braut“. Þá sagði hún of mikið vera í húfi til að bregðast þessum vonum.
Hún varaði samflokksmenn við því að kæruleysi gæti læðst aftan að þeim á meðan flokkurinn mælist sá stærsti í könnunum:
„Enda er ekkert í hendi og við höfum bara enga innistæðu fyrir því að vera kærulaus, eða vanmeta valdaflokkanna sem við ætlum okkur að leysa af hólmi eftir næstu kosningar.“
Ríkisstjórnin í kollhnís og Samfylkingin ferðast innanlands
Kristrún sagði fólk vilja upplifa festu í Samfylkingunni samanborið við sitjandi ríkisstjórn:
„Hvað sögðum við síðast á flokksstjórnarfundinum á Akureyri? Við sögðum: „Þegar það er óreiða hjá ríkisstjórninni – þá á þjóðin að upplifa festu í Samfylkingunni“,“ sagði hún og hélt áfram:
„Og viti menn: Á meðan ríkisstjórnin hélt áfram að fara í alls konar kollhnísa og funda með sjálfri sér um sjálfa sig, [...] þá tókum við enn einn hring um landið – héldum hátt í 30 opna fundi með almenningi, að þessu sinni um atvinnu og samgöngur, og heimsóttum 180 fyrirtæki um land allt; í öllum greinum atvinnulífsins.“
Kallar eftir virkjunum og jarðgöngum
Kristrún sagði ríkisstjórnina hafa skilað svo gott sem auðu í samgöngu- og orkumálum og benti á að þrátt fyrir fyrirheit um frekari jarðgöng hafi engar slíkar framkvæmdir hafist. Sama segir hún um stöðuna í virkjunum.
Í því samhengi sagði hún Samfylkinguna búa yfir einbeittum vilja til verklegra framkvæmda og sé tilbúin til framkvæmda frá fyrsta degi í nýrri ríkisstjórn.
Innviðir ekki í takt við fólksfjölgun
Kristrún sagði hagvöxt á hvern einstakling vera minni hérlendis en gengur og gerist á Norðurlöndum og í Evrópu frá árinu 2017.
Hún segir rót vandans liggja í því að hagvöxtur hafi verið keyrður áfram af vexti í vinnuaflsfrekum atvinnugreinum og samhliða því hafi orðið mikil fólksfjölgun.
Þá benti hún á að fjöldi innflytjenda hér á landi hafi tvöfaldast á sjö árum, án þess að innviðir og grunnþjónusta hafi haldið í við þá þróun.
Þar næst sagði hún hækkandi húsnæðisverð þrýsta á laun sem hafi vakið upp örvæntingu meðal fólks. Hún gagnrýndi ríkisstjórnina fyrir að lofa „sömu 1000 íbúðunum á síðustu árum“, og segir rót vandans teygja sig lengra en einungis fjölda íbúða:
„En vandinn er auðvitað sá, að skortur á atvinnustefnu, samsetning hagvaxtar sem þessi ríkisstjórn hefur ýtt undir, hefur orðið til þess að vandinn bara vindur upp á sig á húsnæðismarkaði. Þau komast aldrei fram fyrir vandann.“
Drónamyndskeið frá hápunkti gossins í nótt
Myndir: Grindavíkurvegur aftur undir hraun
Mæðgur dæmdar til að greiða 64 milljónir
„Erum í miðri hrinu“: Styttist í Eldvörp
Líklega komin á seinni hluta hrinunnar í Svartsengi
Hótar Bretum og Bandaríkjamönnum
Maskína: Framsókn í fallbaráttu
Fullvissa ferðamenn um að hér sé öruggt