Innlent | mbl | 22.4.2024 | 16:20

Sáttur við sína stöðu og finnur fyrir meðbyr

Í könnun Prósents sem birtist í morgun mælist Jón Gnarr með 17,2% fylgi.

„Mér finnst meðbyrinn frábær og kosningabaráttustrategían okkar er að ganga upp,“ segir Jón Gnarr forsetaframbjóðandi í samtali við mbl.is.

Í könnun Prósents sem birtist í Morgunblaðinu í morgun mælist Jón Gnarr með 17,2% og er með fjórða mesta fylgið í þeirri könnun.

Hann segir að fyrrnefnd strategía sé að vinna hlutina jafnt og þétt og að hafa samræmi í því sem verið er að gera. Nefnir hann sem dæmi að nú sé til dæmis verið að kynna stuðningsmenn framboðsins á samfélagsmiðlum.

Frétt af mbl.is

Halla Hrund fer fram úr Jóni Gnarr

Vinna í veikleikum

„Ég er bara sáttur við mína stöðu, mér finnst ég halda mínu fylgi. Þannig mér finnst þetta frábært,“ segir Jón Gnarr.

Þá segir hann greinilegt að fylgið sé á dreifingu ef marka má könnunina.

„Ég hef meira verið að stóla á samfelldan leik frekar en einhver upphlaup eða spretti. Nokkuð samræmi og við erum að halda í styrkleikanna en líka aðeins að vinna í veikleikunum.“

Er að leika í leikriti um helgar

Hann segir þetta stefni í að verða athyglisverða og skemmtilega kosningabaráttu og hann finnur fyrir miklum áhuga fólks á baráttunni.

„Ég held að fólk sé líka að lesa í frambjóðendurna, fylgjast með þeim og jafnvel að skipta um einhverjar skoðun.“

Jón Gnarr er búinn að vera ferðast um landið eins og aðrir frambjóðendur og á næstu dögum stefnir hann á að kíkja á Vestfirði. Þá langar honum að ferðast norður á Eyjafjörð, Akureyri og nágrannasveitarfélög. Hann reynir að ferðast á alla þá staði sem hann kemst á.

„Ég er náttúrulega að leika í leikriti í Borgarleikhúsinu og það eru sýningar um helgar. Þannig ég er svona að sníða mér stakk eftir vexti,“ segir Jón kíminn.