Ömurlegt að ráðist sé gegn fjölskyldum blaðamanna

Formaður Blaðamannafélags Íslands segir það algjörlega ólíðandi að sótt sé að blaðamönnum og fjölskyldum þeirra vegna umfjöllunar þeirra, eins og gerst hefur við Stefán Einar Stefánsson, blaðamann Morgunblaðsins og þáttstjórnanda Spursmála á mbl.is.

„Það er algjörlega ólíðandi að sótt sé að blaðamönnum vegna umfjöllunar þeirra. Enn ömurlegra er að sjá þegar ráðist er gegn fjölskyldum blaðamanna, líkt og þarna er gert,“ segir Sigríður Dögg Auðunsdóttir, formaður Blaðamannafélags Íslands, á Facebook.

Fékk skilaboð í kjölfar þáttarins

Síðastliðinn föstudag var forsetaframbjóðandinn Halla Hrund Logadóttir gestur í Spursmálum og spurði Stefán hana krefjandi spurninga eins og aðra forsetaframbjóðendur í fyrri þáttum.

Vakti þátturinn athygli en í kjölfarið fór Stefáni að berast skilaboð og athugasemdir á samfélagsmiðlum þar sem meðal annars var vegið að fjölskyldu hans.

„Heiftin og hatrið í samfélagsumræðunni í dag er mikið áhyggjuefni. Blaðamenn eiga ekki að þurfa að starfa við þær aðstæður að mislíki fólki umfjöllun þeirra ráðist það að þeim með óvægnum og ómálefnalegum hætti. Það væri óskandi að þau sem hafa eitthvað við umfjöllun blaðamanna að athuga leitaði úrlausna á umkvörtunarefni sínu eftir þartilbærum leiðum,“ segir Sigríður í færslunni. 

Frétt af mbl.is

Spursmál: Halla Hrund situr fyrir svörum

• 1 blogg um fréttina

Bloggað um fréttina

• Páll Vilhjálmsson: Sigríður Dögg ver Moggamann, vantar nýja vini